ಪಂಜಾಬ್ | ಡ್ರಗ್ಸ್ ದಂಧೆ: 510 ಕಡೆಗಳಲ್ಲಿ ದಾಳಿ, 43 ಮಂದಿಯ ಬಂಧನ

ಚಂಡೀಗಢ: ಮಾದಕ ದ್ರವ್ಯ ನಿಗ್ರಹ ಅಭಿಯಾನದ ಭಾಗವಾಗಿ ಭಾನುವಾರ ಒಂದೇ ದಿನ ರಾಜ್ಯದ 510 ಕಡೆಗಳಲ್ಲಿ ದಾಳಿ ನಡೆಸಿರುವ ಪಂಜಾಬ್ ಪೊಲೀಸರು, 43 ಮಂದಿಯನ್ನು ಬಂಧಿಸಿದ್ದಾರೆ ಎಂದು ಅಧಿಕಾರಿ ತಿಳಿಸಿದ್ದಾರೆ.

ಕಳೆದೆರಡು ದಿನಗಳಲ್ಲಿ ಒಟ್ಟು 333 ಕಳ್ಳಸಾಗಣೆದಾರರನ್ನು ಬಂಧಿಸಲಾಗಿದ್ದು, ರಾಜ್ಯಾದ್ಯಂತ 27 ಎಫ್‌ಐಆರ್‌ಗಳನ್ನು ದಾಖಲಿಸಲಾಗಿದೆ.

ಕಳ್ಳಸಾಗಣೆದಾರರಿಂದ 776 ಗ್ರಾಂ ಹೆರಾಯಿನ್, 14 ಕೆ.ಜಿ ಅಫೀಮು, 38 ಕೆ.ಜಿ ಮಾದಕ ಪದಾರ್ಥ, 2,615 ಮಾದಕ ಮಾತ್ರೆ ಮತ್ತು ₹4.60 ಲಕ್ಷ ನಗದನ್ನು ವಶಪಡಿಸಿಕೊಳ್ಳಲಾಗಿದೆ.

2,000ಕ್ಕೂ ಹೆಚ್ಚು ಪೊಲೀಸ್ ಸಿಬ್ಬಂದಿಗಳನ್ನು ಒಳಗೊಂಡ 300ಕ್ಕೂ ಹೆಚ್ಚು ಪೊಲೀಸ್ ತಂಡಗಳು ಕಾರ್ಯಾಚರಣೆಯಲ್ಲಿ ಭಾಗಿಯಾಗಿದ್ದವು.

ಪಂಜಾಬ್ ಅನ್ನು ಡ್ರಗ್ಸ್ ಮುಕ್ತ ರಾಜ್ಯವನ್ನಾಗಿ ಮಾಡಲು ಪಣತೊಟ್ಟಿರುವ ಮುಖ್ಯಮಂತ್ರಿ ಭಗವಂತ್ ಮಾನ್, ಮೂರು ತಿಂಗಳ ಗಡುವು ವಿಧಿಸಿದ್ದಾರೆ.

ಮಾದಕ ದ್ರವ್ಯಗಳ ಹಾವಳಿ ವಿರುದ್ಧ ಕ್ರಮ ಕೈಗೊಳ್ಳಲು ರಾಜ್ಯ ಸರ್ಕಾರ ಐವರು ಸದಸ್ಯರ ಸಂಪುಟ ಉಪಸಮಿತಿಯನ್ನು ರಚಿಸಿದೆ.