ಅತ್ಯಾಚಾರ ಆರೋಪ: ಕೇರಳದ ರ‍್ಯಾಪರ್‌ ವಿರುದ್ಧ ಪ್ರಕರಣ

ತಿರುವನಂತಪುರ: ಮದುವೆಯಾಗುವುದಾಗಿ ನಂಬಿಸಿ ಮಹಿಳೆಯೊಬ್ಬರ ಮೇಲೆ ಅತ್ಯಾಚಾರ ಎಸಗಿರುವ ಆರೋಪದಲ್ಲಿ ಕೇರಳದ ಪ್ರಖ್ಯಾತ ರ‍್ಯಾಪರ್‌ ಹಿರಣ್‌ ದಾಸ್‌ ಮುರುಳಿ ಅಲಿಯಾಸ್‌ ‘ವೇಡನ್‌’ ಮೇಲೆ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ. 

2021–2023ರ ಅವಧಿಯಲ್ಲಿ ಮಹಿಳೆಯೊಬ್ಬರನ್ನು ಮದುವೆಯಾಗುವುದಾಗಿ ನಂಬಿಸಿ, ಆಕೆಯ ಮೇಲೆ ಹಿರಣ್‌ ದಾಸ್ ಪದೇ ಪದೇ ಅತ್ಯಾಚಾರ ಎಸಗಿದ್ದಾರೆಂದು ಆರೋಪಿಸಿ, ಸಂತ್ರಸ್ತ ಮಹಿಳೆ ದೂರು ನೀಡಿದ್ದಾರೆ. ಹೀಗಾಗಿ ಹಿರಣ್ ವಿರುದ್ಧ ಪ್ರಕರಣ ದಾಖಲಿಸಿ, ತನಿಖೆ ನಡೆಸಲಾಗುತ್ತಿದೆ ಎಂದು ಕೊಚ್ಚಿ ನಗರ ಪೊಲೀಸ್‌ ಆಯುಕ್ತರಾದ ಪುಟ್ಟ ವಿಮಲಾದಿತ್ಯ ಹೇಳಿದ್ದಾರೆ. 

ಮಾದಕವಸ್ತು ಹೊಂದಿರುವುದಕ್ಕೆ ಸಂಬಂಧಿಸಿದಂತೆ ಈ ಹಿಂದೆಯೂ ಹಿರಣ್‌ ಅವರನ್ನು ಪೊಲೀಸರು ಬಂಧಿಸಿದ್ದರು. ಈ ವೇಳೆ ಆಡಳಿತಾರೂಢ ಸಿಪಿಎಂ ಮತ್ತು ಕಾಂಗ್ರೆಸಿಗರು ಹಿರಣ್ ದಲಿತನೆಂಬ ಕಾರಣಕ್ಕೆ ಆತನ ಪರವಹಿಸಿದ್ದರು. ಪ್ರಸಕ್ತ ನಡೆದಿರುವ ಬೆಳವಣಿಗೆಯು ಹಿರಣ್‌ನನ್ನು ಬೆಂಬಲಿಸಿದವರನ್ನೂ ಸಂಕಷ್ಟಕ್ಕೆ ಸಿಲುಕಿಸಿದಂತಾಗಿದೆ.