ತಾಲಿಬಾನ್ ಮೇಲೆ ಅಮೆರಿಕ ಪಡೆಗಳ ವಾಯುದಾಳಿ

ಲಷ್ಕರ್ ಗಾಹ್ (ಅಫ್ಗಾನಿಸ್ತಾನ): ಅಫ್ಗಾನಿಸ್ತಾನದ ಭದ್ರತಾ ಪಡೆಗಳ ನೆರವಿನೊಂದಿಗೆ ಅಮೆರಿಕದ ಪಡೆಗಳು ತಾಲಿಬಾನ್‌ನ ಮೇಲೆ ಹೆಲ್ಮಂಡ್ ಪ್ರಾಂತ್ಯದಲ್ಲಿ ಅನೇಕ ಬಾರಿ ವಾಯುದಾಳಿ ನಡೆಸಿವೆ ಎಂದು ಅಮೆರಿಕ ಸೇನೆ ವಕ್ತಾರರು ಸೋಮವಾರ ಇಲ್ಲಿ ತಿಳಿಸಿದರು.

ಕರ್ನಲ್ ಸಾನ್ನಿ ಲೆಜೆಟ್ ಅವರು, ‘ತಾಲಿಬಾನ್‌ ಪಡೆಗಳು ಇತ್ತೀಚೆಗೆ ಹೆಲ್ಮೆಂಡ್‌ ಪ್ರಾಂತ್ಯದ ವಿವಿಧೆಡೆ ದಾಳಿ ನಡೆಸಿದ್ದವು. ಇದು, ಈಚೆಗೆ ಆಗಿದ್ದ ಅಮೆರಿಕ –ತಾಲಿಬಾನ್ ನಡುವಿನ ಒಪ್ಪಂದಕ್ಕೆ ವಿರುದ್ಧವಾಗಿದ್ದವು. ಅಲ್ಲದೆ, ಶಾಂತಿ ಮಾತುಕತೆಯ ಮೇಲೂ ಪ್ರತಿಕೂಲ ಪರಿಣಾಮ ಬೀರುವಂತಿದ್ದವು. ಈಗ ನಡೆಸಿರುವ ವಾಯುದಾಳಿಯಿಂದ ಫೆಬ್ರುವರಿಯಲ್ಲಿ ಆಗಿದ್ದ ಒಡಂಬಡಿಕೆಯ ಉಲ್ಲಂಘನೆಯಾಗಿಲ್ಲ‘ ಎಂದು ತಿಳಿಸಿದರು.

‘ಹೆಲ್ಮೆಂಡ್‌ ಪ್ರಾಂತ್ಯದಲ್ಲಿ ಕೈಗೊಂಡಿರುವ ಆಕ್ರಮಣಕಾರಿ ದಾಳಿಯನ್ನು ತಾಲಿಬಾನ್‌ ತಕ್ಷಣ ನಿಲ್ಲಿಸಬೇಕು. ಮತ್ತು ದೇಶದ ವಿವಿಧೆಡೆ ಕೈಗೊಂಡಿರುವ ಹಿಂಸಾಕೃತ್ಯಗಳನ್ನು ತಗ್ಗಿಸಬೇಕು’ ಎಂದು ಲೆಜೆಂಟ್, ಕಮಾಂಡರ್ ಸ್ಕಾಟ್ ಮಿಲ್ಲರ್‌ರನ್ನು ಉಲ್ಲೇಖಿಸಿ ಟ್ವೀಟ್ ಮಾಡಿದ್ದಾರೆ.

ಅಫ್ಗನ್ ರಾಷ್ಟ್ರೀಯ ಭದ್ರತಾ ಪಡೆಗಳಿಗೆ ದೇಶದ ರಕ್ಷಣೆಗಾಗಿ ಅಗತ್ಯ ಬೆಂಬಲವನ್ನು ಅಮೆರಿಕದ ಪಡೆಗಳು ಮುಂದುವರಿಸಲಿವೆ ಎಂದು ಅವರು ಸ್ಪಷ್ಟಪಡಿಸಿದರು.

ಹೆಲ್ಮೆಂಡ್‌ ಪ್ರಾಂತ್ಯದ ರಾಜಧಾನಿ ಲಷ್ಕರ್ ಗಾಹ್‌ನಲ್ಲಿ ಸೋಮವಾರ ಗುಂಡಿನ ಚಕಮಕಿ, ದಾಳಿ ಪ್ರಕರಣಗಳ ಹಿಂದೆಯೇ ವಾಯುದಾಳಿ ಕುರಿತು ಅಮೆರಿಕ ಹೇಳಿಕೆ ನೀಡಿದೆ.