ಟಿ.ವಿ.ಗಳಲ್ಲಿ ಜ್ಯೋತಿಷದ ವಿಜೃಂಭಣೆ

ಬೆಂಗಳೂರು: ‘ಪ್ರತಿ ಟಿ.ವಿ. ಚಾನೆಲ್‌­ನಲ್ಲೂ ದಿನಕ್ಕೆ­ರಡು ಗಂಟೆ ಜ್ಯೋತಿಷ ಪ್ರಸಾರವಾಗುತ್ತಿದೆ. ಚಾನೆಲ್‌­ಗಳಲ್ಲಿ ಶಿಕ್ಷಣ, ವಿಜ್ಞಾನ ಹಾಗೂ ತಂತ್ರ­ಜ್ಞಾನದ ಬಗ್ಗೆ ಚರ್ಚೆಯೇ ಆಗುತ್ತಿಲ್ಲ. ಉಪಗ್ರಹ­ಗಳನ್ನು ಕಳುಹಿಸುವ ಹೊತ್ತಿಗೆ ನಾವು ಕುಜದೋಷ ಎಂದು ಕುಳಿತು­ಬಿಟ್ಟಿ­ದ್ದೇವೆ’ ಎಂದು  ಪ್ರಸಿದ್ಧ ಬಾಹ್ಯಾ­ಕಾಶ ವಿಜ್ಞಾನಿ ಡಾ.ಯು.­ಆರ್‌.ರಾವ್‌ ತೀವ್ರ ಅಸಮಾ­ಧಾನ ವ್ಯಕ್ತಪಡಿಸಿದರು.

ಇಲ್ಲಿನ ಸೆಂಟ್ರಲ್‌ ಕಾಲೇಜಿನ ಜ್ಞಾನ­ಜ್ಯೋತಿ ಸಭಾಂಗಣದಲ್ಲಿ ಬುಧವಾರ ಬೆಂಗಳೂರು ವಿಶ್ವ­ವಿದ್ಯಾಲಯದ ಸುವರ್ಣ ಮಹೋತ್ಸವ ಚಟುವಟಿಕೆ­ಗಳ ಉದ್ಘಾಟನಾ ಸಮಾರಂಭದಲ್ಲಿ ಅವರು ಮಾತನಾಡಿದರು.

‘ಟಿ.ವಿ. ಚಾನೆಲ್‌ಗಳಲ್ಲಿ ರಾಜ­ಕೀಯಕ್ಕೆ ಮೊದಲ ಆದ್ಯತೆ. ಬಳಿಕ ಕ್ರಿಕೆಟ್‌, ಸಂಗೀತ, ನೃತ್ಯಗಳಿಗೆ ಮಾತ್ರ ಪ್ರಾಧಾನ್ಯತೆ ನೀಡಲಾಗುತ್ತಿದೆ’ ಎಂದು ಅವರು ನೊಂದು ನುಡಿದರು.

‘ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರ ಇರುವುದೇ ಯುವಜನರಿಗಾಗಿ. ಯುವಕ­­ರಾಗಿದ್ದಾಗಲೇ ಉನ್ನತ ಸಾಧನೆ ಮಾಡಬೇಕು. ಈ ಜಗತ್ತಿನ ಶ್ರೇಷ್ಠ ವಿಜ್ಞಾನಿ­­ಗಳೆಲ್ಲ ಅದ್ಭುತ ಸಾಧನೆ ಮಾಡಿದ್ದು ತಮ್ಮ 20–40ರ ವಯಸ್ಸಿ­ನಲ್ಲೇ’ ಎಂದು ಸ್ಮರಿಸಿಕೊಂಡರು
.
‘ನಾನು ಬಹಳ ಕಷ್ಟಪಟ್ಟು ಓದಿ­ದ್ದೇನೆ. ನಾನು ಓದುವ ಹೊತ್ತಿಗೆ ಉಡುಪಿ­­ಯಲ್ಲಿ ಕಾಲೇಜು ಇರಲಿಲ್ಲ. ನಾಲ್ಕು ನದಿಗಳನ್ನು ದಾಟಿ ಕಲಿಯಲು ಮಂಗಳೂರಿಗೆ ಹೋಗಬೇಕಿತ್ತು. ಬಳ್ಳಾರಿ­ಯಲ್ಲಿ ಇಂಟರ್‌­ಮೀಡಿಯೇಟ್‌ ಓದು­ವಾಗ ಮೊದಲ ಬಾರಿಗೆ ರೈಲು ನೋಡಿದೆ. ಕಾಶಿಯ ಬನಾರಸ್‌ ವಿವಿ­ಯಲ್ಲಿ ಕಲಿಯು­ವಾಗ ಬಾಹ್ಯಾಕಾಶ ವಿಜ್ಞಾನದ ಬಗ್ಗೆ ಗೊತ್ತಾಯಿತು’ ಎಂದು ನೆನಪಿಸಿಕೊಂಡರು.

ಅನುದಾನ ನೀಡಿ: ಬೆಂಗಳೂರು ವಿಶ್ವ­ವಿದ್ಯಾಲಯದ ಕುಲಪತಿ ಪ್ರೊ.ಬಿ.­ತಿಮ್ಮೇಗೌಡ, ‘ವಿವಿಯಲ್ಲಿ ನನೆಗುದಿಗೆ ಬಿದ್ದಿರುವ ಕಟ್ಟಡ ಕಾಮಗಾರಿಗಳ ಪೂರ್ಣ­­ಗೊಳಿಸಬೇಕಿದೆ. ಶಿಕ್ಷಕ ಹಾಗೂ ಶಿಕ್ಷಕೇತರ ಹುದ್ದೆಗಳ ನೇಮಕಾತಿ ಆಗಬೇಕಿದೆ. ಇವಕ್ಕೆ ರಾಜ್ಯ ಸರ್ಕಾರ ವಿಶೇಷ ಅನುದಾನ ನೀಡಬೇಕು’ ಎಂದು ಆಗ್ರಹಿಸಿದರು.

ರಾಜಕೀಯಕ್ಕೆ ಬನ್ನಿ
‘ಯುವಕರು ರಾಜಕೀಯ ಕ್ಷೇತ್ರ­ವನ್ನು ಪ್ರವೇಶಿಸಬೇಕು. ಸೇವಾ ಮನೋ­ಭಾವದ ವ್ಯಕ್ತಿಗಳು ಅಧಿಕ ಸಂಖ್ಯೆ­ಯಲ್ಲಿ ರಾಜಕೀಯ ಪ್ರವೇಶಿಸಿ­ದರೆ ರಾಜಕೀಯ ಕ್ಷೇತ್ರ ಶುದ್ಧೀಕರಣ ಆಗುತ್ತದೆ’ ಎಂದು ಸಿ.ಎಂ ಸಿದ್ದ­ರಾಮಯ್ಯ ಅಭಿಪ್ರಾಯಪಟ್ಟರು.

ಕಾರ್ಯಕ್ರಮ ಉದ್ಘಾಟಿಸಿ ಮಾತ­ನಾಡಿದ ಅವರು, ‘ಸೇವೆ ಮಾಡು­ತ್ತೇವೆ ಎಂದು ಹೇಳಿ­ಕೊಂಡು ಬಹಳಷ್ಟು ರಾಜಕಾರಣಿ­ಗಳು ಸಮಾಜವನ್ನು ಲೂಟಿ ಮಾಡಿ­­­ದ್ದಾರೆ. ಆದ್ದರಿಂದ ಯುವಜನರು ಆಸ್ತಿ ಮಾಡುವ ಉದ್ದೇಶದಿಂದ ರಾಜಕೀಯ ಪ್ರವೇಶಿಸಬಾರದು’ ಎಂದು ಕಿವಿಮಾತು ಹೇಳಿದರು.