2ಎ ಮೀಸಲಾತಿ | ಸಿಎಂ ನಿವಾಸದ ಎದುರು ಜೂನ್ 27ರಂದು ಧರಣಿ: ಜಯಮೃತ್ಯುಂಜಯ ಸ್ವಾಮೀಜಿ

ಹುಬ್ಬಳ್ಳಿ:‘ಲಿಂಗಾಯತ ಪಂಚಮಸಾಲಿ ಸಮಾಜಕ್ಕೆ 2ಎ ಮೀಸಲು ನೀಡುವಂತೆ ಆಗ್ರಹಿಸಿ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರ ಶಿಗ್ಗಾವಿ ನಿವಾಸದ ಎದುರು ಜೂನ್ 27ರಂದು ಧರಣಿ ನಡೆಸಲಾಗುವುದು’ಎಂದು ಕೂಡಲಸಂಗಮದ ಬಸವ ಜಯ ಮೃತ್ಯುಂಜಯ ಸ್ವಾಮೀಜಿ ಹೇಳಿದರು.

ಮಂಗಳವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ‘ಪಂಚಮಸಾಲಿ ಸಮಾಜ ಮುಖ್ಯಮಂತ್ರಿ ಅವರ ಮೇಲೆ ಭರವಸೆ ಇಟ್ಟಿದೆ. ಆದರೆ, ಅವರು ಅದನ್ನು ಕಳೆದುಕೊಳ್ಳುವ ಕೆಲಸ ಮಾಡುತ್ತಿದ್ದಾರೆ. ಮೀಸಲಾತಿ ನೀಡುವ ಕುರಿತು ಅವರು ತಮ್ಮ ನಿಲುವು ಏನೆಂಬುದನ್ನು ಕೂಡಲೇ ಸ್ಪಷ್ಟಪಡಿಸಬೇಕು’ಎಂದು ಆಗ್ರಹಿಸಿದರು.

ಓದಿ...ಬಸವಣ್ಣನವರಪಠ್ಯ ಪರಿಷ್ಕರಣೆ:ಎದೆಗೆ ಕಲ್ಲು ಹೊಡೆದ ಹಾಗಾಯಿತು –ಜಯಮೃತ್ಯುಂಜಯ ಶ್ರೀ

‘ಶಿಗ್ಗಾವಿ ಕ್ಷೇತ್ರದ ಪಂಚಮಸಾಲಿ ಸಮಾಜದವರು ಬೊಮ್ಮಾಯಿ ನಂಬಿಕಸ್ಥರು ಅಲ್ಲ‌ ಎಂದಿದ್ದರು. ಆದರೂ ನಾವು ನಿಮ್ಮ ಮೇಲೆ ನಂಬಿಕೆ ಇಟ್ಟೆದ್ದೆವು. ರಾಣಿ ಚನ್ನಮ್ಮನ ಜಯಂತಿ ದಿನದಿಂದ ನೀವು ಕಣ್ಣೀರು ಹಾಕಿ, ‘ನಮಗೆ ರೊಟ್ಟಿ ಕೊಟ್ಟಿದ್ದಿರಿ, ನಿಮ್ಮನ್ನು ನಾನು ಕೈ ಬಿಡೋದಿಲ್ಲ’ಎಂದು ಹೇಳಿದ್ದೀರಿ. ಈಗ ಮೀಸಲಾತಿ ನೀಡಲು ನಿಮಗೆ ಯಾಕೆ ಸಾಧ್ಯವಾಗುತ್ತಿಲ್ಲ? ಮೊದಲು ಸಮಾಜದ ಬಡ ಮಕ್ಕಳ ಕಣ್ಣೀರು ಒರೆಸುವ ಕೆಲಸ‌ ಮಾಡಿ. ಯಾರದ್ದೋ ಮಾತು ಕೇಳಿ, ಮೀಸಲಾತಿ ನೀಡುವ ವಿಚಾರದಲ್ಲಿ ಹಿಂದೇಟು ಹಾಕಬೇಡಿ’ಎಂದು ವಿನಂತಿಸಿದರು.