ಧರ್ಮಸ್ಥಳ ಪ್ರಕರಣ: ಗೃಹ ಸಚಿವ ಪರಮೇಶ್ವರ– SIT ಮುಖ್ಯಸ್ಥ ಮೊಹಾಂತಿ ಚರ್ಚೆ

ಬೆಂಗಳೂರು: ಧರ್ಮಸ್ಥಳ ಗ್ರಾಮದಲ್ಲಿ ಅಪರಾಧ ಕೃತ್ಯಗಳಿಗೆ ಸಂಬಂಧಿಸಿದ ಮೃತದೇಹಗಳನ್ನು ಹೂತು ಹಾಕಲಾಗಿದೆ ಎಂದು ಆರೋಪಿಸಲಾದ ಪ್ರಕರಣದ ವಿಚಾರಣೆ ನಡೆಸುತ್ತಿರುವ ವಿಶೇಷ ತನಿಖಾ ತಂಡದ (ಎಸ್‌ಐಟಿ) ಮುಖ್ಯಸ್ಥ ಪ್ರಣವ್‌ ಮೊಹಾಂತಿ ಬುಧವಾರ ಗೃಹ ಸಚಿವ ಡಾ.ಜಿ. ಪರಮೇಶ್ವರ ಅವರನ್ನು ಭೇಟಿ ಮಾಡಿ ಅರ್ಧ ಗಂಟೆ ಚರ್ಚೆ ನಡೆಸಿದರು.

ಪ್ರಕರಣ ಕುರಿತು ಇದುವರೆಗೂ ನಡೆದ ಬೆಳವಣಿಗೆ, ಸಿಕ್ಕಿರುವ ಸಾಕ್ಷ್ಯಗಳು, ತನಿಖೆಯ ಸೂಕ್ಷ್ಮಗಳು, ಎಸ್‌ಐಟಿ ಅನುಸರಿಸಿದ ಕ್ರಮಗಳು, ತನಿಖೆಯ ವಿವರಗಳನ್ನು ಕುರಿತು ಗೃಹ ಸಚಿವರ ಜತೆ ಮಾಹಿತಿ ಹಂಚಿಕೊಂಡರು. ಎಸ್‌ಐಟಿ ಸದಸ್ಯರೂ ಆದ ನೇಮಕಾತಿ ವಿಭಾಗದ ಡಿಐಜಿ ಎಂ.ಎನ್‌.ಅನುಚೇತ್‌ ಜತೆಗಿದ್ದರು.

ಮೊಹಾಂತಿ ಜತೆಗಿನ ಚರ್ಚೆಯ ನಂತರ ಗೃಹ ಸಚಿವ ಪರಮೇಶ್ವರ ಅವರು ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರನ್ನು ಭೇಟಿ ಮಾಡಿ ವಿವರ ನೀಡಿದರು ಎಂದು ಗೊತ್ತಾಗಿದೆ.