‘ಮೀ ಟೂ ದುರುಪಯೋಗ ಸಲ್ಲದು’

ಹುಬ್ಬಳ್ಳಿ: 'ಮಿ ಟೂ ಒಳ್ಳೆಯ ಅಭಿಯಾನ. ದೌರ್ಜನ್ಯಕ್ಕೆ ಒಳಗಾಗಿರುವ ಎಲ್ಲರೂ ಧ್ವನಿ ಎತ್ತಬೇಕು. ಆದರೆ ದುರುಪಯೋಗ ಮಾಡಿಕೊಳ್ಳುವುದು ಸರಿಯಲ್ಲ' ಎಂದು ನಟಿ ರಾಗಿಣಿ ಹೇಳಿದರು.

ಇಲ್ಲಿ ಮಂಗಳವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, 'ನಾನು ನನ್ನದೇ ಹಾದಿಯಲ್ಲಿ ಸಾಗಿದ ಕಾರಣ ನನಗೆ ಅಂತಹ ಯಾವುದೇ ಕೆಟ್ಟ ಅನುಭವವಾಗಿಲ್ಲ. ಒತ್ತಡ ಸೇರಿದಂತೆ ಹಲವು ಕಾರಣಗಳಿಗಾಗಿ ಅಂತಹ ಘಟನೆಗಳು ನಡೆಯುತ್ತವೆ. ದೌರ್ಜನ್ಯಕ್ಕೆ ಲಿಂಗಭೇದ ಇಲ್ಲ. ಇದೊಂದು ತಾರ್ಕಿಕ ಅಂತ್ಯಕ್ಕೆ ಹೋಗಲಿದೆ ಎಂಬ ವಿಶ್ವಾಸ ಇದೆ’ ಎಂದರು.

‘ಕನ್ನಡದ ಖ್ಯಾತ ನಟರು ಈ ಬಗ್ಗೆ ಧ್ವನಿ ಎತ್ತದಿರುವುದು ಆಶ್ಚರ್ಯ ತಂದಿದೆ. ಅವರೂ ಬೆಂಬಲ ನೀಡಬಹುದು ಎಂಬ ವಿಶ್ವಾಸ ಇದೆ. ತನುಶ್ರೀ ದತ್ತ ಅವರು ಎಂಟು ವರ್ಷಗಳ ಹಿಂದೆ ಆದ ಪ್ರಕರಣವನ್ನು ಪ್ರಸ್ತಾಪಿಸಿ ಅಭಿಯಾನ ಆರಂಭಿಸಿದರು.

ದೌರ್ಜನ್ಯ ನಡೆದ ತಕ್ಷಣವೇ ಅವರು ಧೈರ್ಯವಾಗಿ ಹೇಳಿದ್ದರೆ ಅದರ ಪರಿಣಾಮ ಬೇರೆಯೇ ಇರುತ್ತಿತ್ತು. ಕೆಲವರು ಶ್ರಮಪಡದೇ ಯಶಸ್ಸು ಪಡೆಯಲು ವಾರ್ಮ ಮಾರ್ಗ ಹಿಡಿಯಬಹುದು, ಅದು ಅವರಿಗೆ ಬಿಟ್ಟ ವಿಷಯ’ ಎಂದರು.