‘ಮನ್‌ ಕಿ ಬಾತ್‌’ನಲ್ಲಿ ರಾಜ್ಯದ ಜೇನು ಉತ್ಪಾದಕರ ಉಲ್ಲೇಖ, ಶ್ಲಾಘನೆ

ತುಮಕೂರು/ಮಂಗಳೂರು: ಪ್ರಧಾನಿ ನರೇಂದ್ರ ಮೋದಿ ಅವರು ಭಾನುವಾರ ‘ಮನ್ ಕೀ ಬಾತ್’ ಕಾರ್ಯಕ್ರಮದಲ್ಲಿ ರಾಜ್ಯದ ಎರಡು ಜೇನು ಉತ್ಪಾದಕ ಸಂಸ್ಥೆಗಳ ಸಾಧನೆ ಉಲ್ಲೇಖಿಸಿ ಶ್ಲಾಘಿಸಿದ್ದಾರೆ. 

ತುಮಕೂರು ತಾಲ್ಲೂಕಿನ ಗೂಳೂರುನಲ್ಲಿ ಮಹಿಳೆಯರೇ ಮುನ್ನಡೆಸುತ್ತಿರುವ ‘ಶಿವಗಂಗಾ ಜೇನು ಕೃಷಿ– ರೈತ ಉತ್ಪಾದಕ ಸಂಸ್ಥೆ’ ಹಾಗೂ  ದಕ್ಷಿಣ ಕನ್ನಡ ಜಿಲ್ಲೆಯ ಪುತ್ತೂರಿನ ಗ್ರಾಮಜನ್ಯ ರೈತರ ಉತ್ಪಾದಕ ಕಂಪನಿಯ ಹೆಸರನ್ನು ಉಲ್ಲೇಖಿಸಿ ಪ್ರಧಾನಿ ಮೆಚ್ಚುಗೆ ಸೂಚಿಸಿದ್ದಾರೆ.

‘ಶಿವಗಂಗಾ ಜೇನು ಕೃಷಿ– ರೈತ ಉತ್ಪಾದಕ ಸಂಸ್ಥೆ ಮಹಿಳೆಯರಿಗೆ ಕೃಷಿ ವಿಜ್ಞಾನ ಕೇಂದ್ರದಿಂದ ತಲಾ 2 ಜೇನು ಪೆಟ್ಟಿಗೆ ವಿತರಿಸಲಾಗಿದೆ. ಮಹಿಳೆಯರು ಲಕ್ಷಾಂತರ ರೂಪಾಯಿ ಆದಾಯ ಗಳಿಸುತ್ತಿದ್ದಾರೆ’ ಎಂದು ಪ್ರಧಾನಿ ಮೋದಿ ಶ್ಲಾಘಿಸಿದ್ದಾರೆ.

2022ರಲ್ಲಿ ಆರಂಭವಾದ ಶಿವಗಂಗಾ ಸಂಸ್ಥೆ ಧಾನ್‌ ಫೌಂಡೇಷನ್‌ ಸಹಕಾರದಲ್ಲಿ ನಡೆಯುತ್ತಿದೆ. ತಾಲ್ಲೂಕಿನ ಕೆ.ಪಾಲಸಂದ್ರ, ಗೂಳೂರು, ಹೆತ್ತೇನಹಳ್ಳಿ ಮತ್ತು ಹೆಬ್ಬೂರು ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಗ್ರಾಮಗಳ 300 ಜನ ರೈತ ಮಹಿಳೆಯರು ಸಂಸ್ಥೆಯಲ್ಲಿ ನೋಂದಣಿ ಮಾಡಿಕೊಂಡಿದ್ದಾರೆ.

‘ಸಂಸ್ಥೆಯ ರೈತ ಮಹಿಳೆಯರು ಸದ್ಯ ವರ್ಷಕ್ಕೆ 1 ಸಾವಿರ ಕೆ.ಜಿ ಜೇನು ತುಪ್ಪ ಉತ್ಪಾದಿಸುತ್ತಿದ್ದಾರೆ. ಹಿರೇಹಳ್ಳಿ ಕೆವಿಕೆಯಲ್ಲಿ ಸಂಸ್ಕರಣೆ ಮಾಡಿ, ಮಾರಾಟ ಮಾಡಲಾಗುತ್ತದೆ’ ಎಂದು ಸಂಸ್ಥೆ ಕಾರ್ಯನಿರ್ವಾಹಕ ನಿರ್ದೇಶಕ ಎನ್‌.ಕೆ.ವಸಂತಕುಮಾರ್‌ ತಿಳಿಸಿದರು.

 ‘ಪುತ್ತೂರಿನ ಗ್ರಾಮಜನ್ಯ ಸಂಸ್ಥೆ ನಿಸರ್ಗದ ಕೊಡುಗೆಯಾದ ಜೇನುತುಪ್ಪಕ್ಕೆ ಹೊಸ ದಿಸೆ ತೋರಿಸಿದೆ. ಆಧುನಿಕ ಸಂಸ್ಕರಣಾ ಘಟಕ, ಪ್ರಯೋಗಾಲಯ, ಸಂಗ್ರಹಾಗರಗಳನ್ನು ಗ್ರಾಮಜನ್ಯ ಹೊಂದಿದೆ. ಗ್ರಾಮೀಣ ಪ್ರದೇಶದ ಈ ಜೇನುತುಪ್ಪವು ಬ್ರ್ಯಾಂಡೆಡ್ ಉತ್ಪನ್ನವಾಗಿ ನಗರಗಳನ್ನು ತಲುಪುತ್ತಿದೆ. ಈ ಪ್ರಯತ್ನದಿಂದ ರೈತರಿಗೂ ಪ್ರಯೋಜನವಾಗಿದೆ’ ಎಂದು ಪ್ರಧಾನಿ ಹೇಳಿದ್ದಾರೆ.  

ಈ ಬಗ್ಗೆ ಸಂತಸ ವ್ಯಕ್ತಪಡಿಸಿದ ಸಂಸ್ಥೆಯ ನಿರ್ದೇಶಕ (ಕಾರ್ಯಾಚರಣೆ) ರಾಮಪ್ರತೀಕ್‌ ಕರಿಯಾಲ, ‘ಇದರಿಂದ ನಮ್ಮ ಎಫ್‌ಪಿಒಗೆ ಹಾಗೂ ಅದರ ಚಟುವಟಿಕೆಗೆ ಉತ್ತೇಜನ ಸಿಗಲಿದೆ’ ಎಂದರು. 

‘ಆತ್ಮನಿರ್ಭರ ಭಾರತ ಕಾರ್ಯಕ್ರಮದಡಿ ನಾವು ರೈತರ ಉತ್ಪಾದಕ ಕಂಪನಿಯನ್ನು 2020ರಲ್ಲಿ ಸ್ಥಾಪಿಸಿದೆವು. ರಾಷ್ಟ್ರೀಯ ಜೇನ್ನೊಣ ಮಂಡಳಿ (ಎನ್‌ಬಿಬಿ) ಸಣ್ಣ ರೈತರ ಕೃಷಿ ವ್ಯವಹಾರ ಒಕ್ಕೂಟದ ಮೂಲಕ ಗ್ರಾಮಜನ್ಯ ಕಂಪನಿಗೆ (ಎಫ್‌ಪಿಸಿ) ಲಿಮಿಟೆಡ್‌ಗೆ ₹2.22 ಕೋಟಿ ನೆರವು ಮಂಜೂರು ಮಾಡಿದೆ. ನಮ್ಮ ಎಫ್‌ಪಿಸಿ 950 ಕೃಷಿಕರನ್ನು ಷೇರುದಾರರನ್ನಾಗಿ ಹೊಂದಿದ್ದು, ಅವರಲ್ಲಿ ಮೂರನೇ ಒಂದರಷ್ಟು ಮಂದಿ ಜೇನುಕೃಷಿಯಲ್ಲಿ ತೊಡಗಿದ್ದಾರೆ. ಕೊಡಗು ಜಿಲ್ಲೆ ಹಾಗೂ ಕೇರಳದ ಕಾಸರಗೋಡು ಜಿಲ್ಲೆಯ ಜೇನು ಕೃಷಿಕರಿಂದಲೂ ಜೇನು ತುಪ್ಪ ಪಡೆಯುತ್ತೇವೆ’ ಎಂದರು.