‘ಕೈ’ಗೆ ಪಾ‘ಕೈ’ಸ್ತಾನ್ ಎಂದು ಕೆರಳಿಸಿದ ಬಿಜೆಪಿ: ಕಾನೂನು ಕ್ರಮ ಎಂದ ಕಾಂಗ್ರೆಸ್

ಬೆಂಗಳೂರು: ವಿಧಾನಸೌಧದ ಒಳಗೆ ಪಾಕಿಸ್ತಾನ್ ಜಿಂದಾಬಾದ್ ಘೋಷಣೆ ಕೂಗಲಾಗಿದೆ ಎಂಬ ಆರೋಪಗಳಿಗೆ ಸಂಬಂಧಿಸಿದಂತೆ ಬಿಜೆಪಿ–ಕಾಂಗ್ರೆಸ್ ವಾಕ್ಸಮರ ತೀವ್ರ ಬಿರುಸು ಪಡೆದುಕೊಂಡಿದೆ.

ಇನ್ನು, X ತಾಣದಲ್ಲಿ ಬಿಜೆಪಿ ಹಾಕಿರುವ ಪೋಸ್ಟರ್‌ ಒಂದು ಕಾಂಗ್ರೆಸ್ ಅನ್ನು ತೀವ್ರ ಕೆರಳಿಸಿದೆ. ಆ ಪೋಸ್ಟರ್ ಅನ್ನು ತೆಗೆದು ಹಾಕದಿದ್ದರೇ ಗ್ಯಾರಂಟಿ ದೂರು ನೀಡುತ್ತೇವೆ ಎಂದು ಕಾಂಗ್ರೆಸ್ ಎಚ್ಚರಿಕೆ ನೀಡಿದೆ.

ಇಂದು ಮಧ್ಯಾಹ್ನ ಟ್ವೀಟ್ ಮಾಡಿರುವ ಕರ್ನಾಟಕ ಬಿಜೆಪಿ, ವಿಶೇಷ ಪೋಸ್ಟರ್ ಜೊತೆ ಕಾಂಗ್ರೆಸ್ ಅನ್ನು ಕೆರಳಿಸಿದೆ. ಹಸಿರು ಬಣ್ಣದ ಹಸ್ತದ ಚಿತ್ರದಲ್ಲಿ ‘ಪಾಕಿಸ್ತಾನ್ ಜಿಂದಾಬಾದ್’ ಎಂದು ಚಿತ್ರಿಸಿ, ಅದಕ್ಕೆ ಪಾ‘ಕೈ’ಸ್ತಾನ್ ಎಂದು ಬರೆದಿದೆ.

ಭಾರತದಲ್ಲಿ ಪಾ"ಕೈ"ಸ್ತಾನವನ್ನು ಬೆಂಬಲಿಸುವವರ "ಕೈ"ಗಳನ್ನು ಹೆಡೆಮುರಿ ಕಟ್ಟಿ ಎಂದು ಆಗ್ರಹಿಸಿದೆ.

ಇದಕ್ಕೆ ತೀವ್ರ ವಿರೋಧ ವ್ಯಕ್ತಪಡಿಸಿರುವ ಕಾಂಗ್ರೆಸ್, ಈ ಅವಹೇಳನಕಾರಿ ಪೋಸ್ಟ್ ಡಿಲೀಟ್ ಮಾಡದಿದ್ದರೆ ಕಾಂಗ್ರೆಸ್ ಪಕ್ಷ ಕಠಿಣ ಕಾನೂನು ಕ್ರಮ ಜರುಗಿಸುವುದು ನಿಶ್ಚಿತ ಎಂದಿದೆ.

ಕಾಂಗ್ರೆಸ್‌ನ ಇದೇ ಟ್ವೀಟ್ ಅನ್ನು ರಿಟ್ವೀಟ್ ಮಾಡಿರುವ ಬಿಜೆಪಿ, ನೀವು ದೂರು ದಾಖಲಿಸುವುದು ಪಾಕಿಸ್ತಾನದಲ್ಲೋ ಅಥವಾ ಭಾರತದಲ್ಲೋ? ಎಂದು ಪ್ರಶ್ನೆ ಕೇಳಿದೆ.