ಹೆಣ್ಣು ದಿಟ್ಟವಾಗಿ ಬರೆದರೆ ಅನುಮಾನದ ಕಣ್ಣು

ಬೆಂಗಳೂರು: ಹೆಣ್ಣು ಏನನ್ನು ಬರೆಯಬೇಕು? ಆಕೆ ರಚಿಸುವ ಸಾಹಿತ್ಯದ ಕಥಾವಸ್ತು ಏನಾಗಿರಬೇಕು ಮತ್ತು ಏನಾಗಿರಬಾರದು. ಲೈಂಗಿಕತೆ ಅಥವಾ ಪ್ರಣಯದ ಕುರಿತು ಬರೆದರೆ ಅದು ಆಕೆಯ ಸ್ವಂತ ಅನುಭವವೇ ಆಗಿರಬೇಕು ಎನ್ನುವ ಸಮಾಜ. ತನ್ನ ದೇಹದ ಅಂಗಗಳ ಕುರಿತು ಬರೆದರೆ, ಇವಳು ‘ಅಂಥವಳೇ’ ಇರಬೇಕು ಎನ್ನುವ ಫೇಸ್‌ಬುಕ್‌ ದಾಳಿಗಳು...

ಮಹಿಳಾ ಸಾಹಿತ್ಯ ಮತ್ತು ಸಾಹಿತ್ಯ ಸೃಷ್ಟಿಸುವ ಮಹಿಳೆಯ ಕುರಿತು ಇಂಥ ಹಲವು ಆಯಾಮದ ಚರ್ಚೆಗೆ ಬುಕ್‌ಬ್ರಹ್ಮ ಸಾಹಿತ್ಯ ಉತ್ಸವದ ‘ಅಂಗಳ’ ವೇದಿಕೆಯಲ್ಲಿ ನಡೆದ ‘ಸ್ತ್ರೀ ಎಂದರೆ ಅಷ್ಟೇ ಸಾಕೆ?: ಮಹಿಳಾ ಬರಹ’ ಎನ್ನುವ ಗೋಷ್ಠಿ ಸಾಕ್ಷಿಯಾಯಿತು. ಚರ್ಚೆಯಲ್ಲಿ ಭಾಗವಹಿಸಿದ್ದ ಲೇಖಕಿಯರಾದ ಹೇಮಾ ಪಟ್ಟಣಶೆಟ್ಟಿ, ಪದ್ಮಿನಿ ನಾಗರಾಜು, ಶಾಂತಿ ಅಪ್ಪಣ್ಣ ಅವರು ತಮ್ಮ ಅನುಭವಗಳನ್ನು, ಅಭಿಪ್ರಾಯಗಳನ್ನು ಹಂಚಿಕೊಂಡರು.

‘ಲೇಖಕನೊಬ್ಬ ತನ್ನ ಸಾಹಿತ್ಯದಲ್ಲಿ ಬರೆಯುವ ಪ್ರಣಯ ಹಾಗೂ ಲೈಂಗಿಕತೆಯ ವಿವರಗಳು ಆತನ ಕಲೆಗಾರಿಕೆ ಎನ್ನಲಾಗುತ್ತದೆ. ಆದರೆ, ಇಂಥದ್ದನ್ನು ಹೆಣ್ಣೊಬ್ಬಳು ಬರೆಯಬಾರದು ಎಂದು ಈ ಸಮಾಜ ಬಯಸುತ್ತದೆ. ಒಂದು ವೇಳೆ ಇಂಥ ಸಾಹಿತ್ಯವನ್ನು ಹೆಣ್ಣೊಬ್ಬಳು ಬರೆದಳು ಎಂದಾದರೆ ಆ ಸಾಹಿತ್ಯವನ್ನು ಓದಬಾರದು ಎನ್ನಲಾಗುತ್ತದೆ’ ಎಂದು ಲೇಖಕಿಯರಾದ ಪದ್ಮಿನಿ ಮತ್ತು ಚರ್ಚೆಯ ಸಮನ್ವಯಕಾರರಾಗಿದ್ದ ಕುಸುಮಾ ಆಯರಹಳ್ಳಿ ಹೇಳಿದರು.

ಸಮಾರಂಭವೊಂದರಲ್ಲಿ ಕವಯತ್ರಿ ಮಮತಾ ಸಾಗರ್‌ ಅವರು ವಾಚಿಸಿದ ಕವನ ಮತ್ತು ಅದರ ಸುತ್ತ ಇತ್ತೀಚೆಗೆ ಹುಟ್ಟಿಕೊಂಡ ವಿವಾದದ ಕುರಿತು ಲೇಖಕಿ ಹೇಮಾ ಪ್ರಸ್ತಾಪಿಸಿದರು. ‘ನಿಸ್ಸಂಕೋಚವಾಗಿ ಅಥವಾ ದಿಟ್ಟವಾಗಿ ಬರೆಯುವ ಮಹಿಳೆಯರನ್ನು ಈ ಸಮಾಜವು ಅವಮಾನಿಸುತ್ತದೆ ಮತ್ತು ಕೆಟ್ಟ ದೃಷ್ಟಿಯಿಂದ ನೋಡುತ್ತದೆ. ಇದೇ ಮಾದರಿ ಗಂಡಸರು ಬರೆಯುವ ಸಾಹಿತ್ಯಕ್ಕೆ ಅನ್ವಯಿಸುವುದಿಲ್ಲ’ ಎಂದು ಸಭೆಯಲ್ಲಿ ಆಕ್ರೋಶ ವ್ಯಕ್ತವಾಯಿತು.

‘ಯಾಕ್ರಿ ಹಿಂಗೆಲ್ಲಾ ಬರೀತೀರಾ?’