ವಾಷಿಂಗ್ಟನ್: ಅಮೆರಿಕ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ ನಾಸಾ, ಅನ್ಯಗ್ರಹ ಪತ್ತೆಹಚ್ಚಲು ಟ್ರಾನ್ಸಿಟಿಂಗ್ ಎಕ್ಸೊಪ್ಲಾನೆಟ್ ಸರ್ವೆ ಸ್ಯಾಟಲೈಟ್ (ಟಿಇಎಸ್ಎಸ್) ಎಂಬ ಬಾಹ್ಯಾಕಾಶ ನೌಕೆಯನ್ನು ಏಪ್ರಿಲ್ 16ರಂದು ಉಡಾವಣೆ ಮಾಡಲಿದೆ.
‘ಫ್ಲಾರಿಡಾದಲ್ಲಿ ನೌಕೆಯ ಅಂತಿಮ ಪರೀಕ್ಷೆಗಳು ನಡೆಯುತ್ತಿವೆ. ಇದು ಅನ್ಯಗ್ರಹಗಳು, ಅವುಗಳ ವಾತಾವರಣ ಹಾಗೂ ಜೀವಿಗಳ ಕುರುಹುಗಳನ್ನು ಪತ್ತೆಹಚ್ಚಲಿದೆ’ ಎಂದು ಕಾರ್ಯಕ್ರಮದ ಮುಖ್ಯಾಧಿಕಾರಿ ಜಾರ್ಜ್ ರಿಕ್ಕರ್ ತಿಳಿಸಿದ್ದಾರೆ.
ಗ್ರಹಗಳ ನಿಯಮಿತ ‘ಪರ್ಯಟನೆ’ ವಿದ್ಯಮಾನದ ಮೇಲೆ ನಿಗಾ ವಹಿಸುವುದು ಈ ನೌಕೆಯ ಮುಖ್ಯ ಕೆಲಸ. ನಾಸಾದ ‘ಕೆಪ್ಲರ್’ ನೌಕೆ ಕೂಡಾ ಇದೇ ವಿಧಾನ ಅನುಸರಿಸಿ ಸುಮಾರು 2,600 ಗ್ರಹಗಳನ್ನು ಪತ್ತೆಹಚ್ಚಿತ್ತು.
ನಕ್ಷತ್ರಗಳ ಸಂಖ್ಯೆಗಿಂತ ಗ್ರಹಗಳ ಸಂಖ್ಯೆ ಹೆಚ್ಚಿದೆ ಎಂಬ ಅಂಶವನ್ನು ಕೆಪ್ಲರ್ ನೌಕೆ ಪತ್ತೆಹಚ್ಚಿತ್ತು. ಆದರೆ ಈಗ ಉಡಾವಣೆಯಾಗುತ್ತಿರುವ ಟಿಇಎಸ್ಎಸ್ ನೌಕೆಯು, ನಮ್ಮ ಸಮೀಪದ ನಕ್ಷತ್ರಗಳಲ್ಲಿರಬಹುದಾದ ವೈವಿಧ್ಯಮಯ ಗ್ರಹಗಳ ಮೇಲೆ ಬೆಳಕು ಚೆಲ್ಲಲಿದೆ’ ಎಂದು ನಾಸಾದ ನಿರ್ದೇಶಕ ಪೌಲ್ ಹರ್ಟ್ಸ್ ಹೇಳಿದ್ದಾರೆ.
ನಮ್ಮಿಂದ 300 ಜ್ಯೋತಿರ್ವರ್ಷಗಳಷ್ಟು ದೂರದಲ್ಲಿರುವ ಹಾಗೂ 30ರಿಂದ 100 ಪಟ್ಟು ಪ್ರಕಾಶಮಾನವಾಗಿರುವ ನಕ್ಷತ್ರಗಳ ಮೇಲೆ ಇದು ಪ್ರಮುಖವಾಗಿ ಅಧ್ಯಯನ ನಡೆಸಲಿದೆ. ಆಕಾಶಕಾಯಗಳ ದ್ರವ್ಯರಾಶಿ, ಸಾಂದ್ರತೆ ಹಾಗೂ ವಾತಾವರಣದ ಸಂಯೋಜನೆ ಅರಿಯಬೇಕಾದರೆ ಪ್ರಖರ ಬೆಳಕು ಸೂಸುವ ಆಕಾಶಕಾಯಗಳು ಸೂಕ್ತ. ವಾತಾವರಣದಲ್ಲಿರಬಹುದಾದ ನೀರು ಅಥವಾ ಇತರೆ ಪ್ರಮುಖ ಕಣಗಳ ಅಧ್ಯಯನದಿಂದ ಅಲ್ಲಿ ಜೀವಿಗಳು ಬದುಕುವ ಸಾಧ್ಯತೆಯಿದೆಯೇ ಎಂಬುದನ್ನು ತಿಳಿಯಬಹುದು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.