‘ಪ್ರಸವ ಪ್ರವಾಸೋದ್ಯಮ’ ಚೀನಾಗೆ ಹೆಚ್ಚಿನ ಲಾಭ

ವಾಷಿಂಗ್ಟನ್‌ : ಅಮೆರಿಕದಲ್ಲಿ ಹುಟ್ಟಿದ ಕಾರಣದಿಂದಲೇ ಇಲ್ಲಿನ ಪೌರತ್ವದ ಹಕ್ಕು ದೊರೆಯುವುದು ‘ಪ್ರಸವ ಪ್ರವಾಸೋದ್ಯಮ’ವನ್ನು ಸೃಷ್ಟಿಸಿದೆ ಎಂದು ವ್ಯಂಗ್ಯವಾಡಿರುವ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌, ಚೀನಾದವರಿಗೆ ಇದರಿಂದ ಹೆಚ್ಚಿನ ಪ್ರಯೋಜನವಾಗುತ್ತಿದೆ ಎಂದಿದ್ದಾರೆ.

ಪ್ರಸವ ಪ್ರವಾಸೋದ್ಯಮದ ಎಂದರೆ, ಮಗು ವಿಗೆ ಜನ್ಮ ನೀಡುವ ಏಕೈಕ ಉದ್ದೇಶ ದಿಂದಲೇ ಜನ ಬೇರೆ ದೇಶಕ್ಕೆ ಪ್ರವಾಸ ಬರುವುದು ಎಂದರ್ಥ. ಆ ಕೆಲಸ ಮುಗಿದ ಬಳಿಕ ಅವರಲ್ಲಿ ಬಹುತೇಕರು ತಾಯ್ನಾಡಿಗೆ ಮರಳುತ್ತಾರೆ ಎಂದು ಕೊಲಂಬಿಯಾದಲ್ಲಿ ನಡೆದ ಚುನಾವಣಾ ರ‍್ಯಾಲಿಯಲ್ಲಿ ಹೇಳಿದರು.

‘ಇದೇ ರೀತಿ ಚೀನಾದಿಂದಲೂ ಹಲವರು ಬರುತ್ತಾರೆ. ನಾವು ದ್ವೇಷಿಸುವ ನಮ್ಮ ಶತ್ರುವಾದ ಚೀನಾ ಎಂಬ ಸರ್ವಾಧಿಕಾರಿಯು, ತನ್ನ ಪತ್ನಿಯಿಂದ ಅಮೆರಿಕದ ನೆಲದಲ್ಲಿ ಮಗು ಹೊಂದುತ್ತಾನೆ. ಶುಭಾಶಯ! ಆತನ ಮಗ ಅಥವಾ ಮಗಳು ಈಗ ಅಮೆರಿಕದ ನಾಗರಿಕರು. ಇಂತಹ ನೀತಿಯಲ್ಲಿ ಏನಾದರೂ ಅರ್ಥವಿದೆಯೇ’ ಎಂದು ಅವರು ಬೆಂಬಲಿಗರನ್ನು ಕೇಳಿದರು.