28 ವರ್ಷ ಬಳಿಕ ಜಿ-24 ಅಧ್ಯಕ್ಷ ಸ್ಥಾನ ಭಾರತಕ್ಕೆ

ನ್ಯೂಯಾರ್ಕ್ (ಐಎಎನ್‌ಎಸ್):  ಸುದೀರ್ಘ 28 ವರ್ಷಗಳ ನಂತರ ಜಿ-24 ರಾಷ್ಟ್ರಗಳ ಅಧ್ಯಕ್ಷ ಸ್ಥಾನ ಮತ್ತೊಮ್ಮೆ ಭಾರತ ಅಲಂಕರಿಸಿದೆ. ಹಣಕಾಸು ಸಚಿವ ಪ್ರಣವ್ ಮುಖರ್ಜಿ ಅವರು ಎರಡನೇ ಬಾರಿಗೆ ಇದರ ಅಧ್ಯಕ್ಷರಾಗಿದ್ದಾರೆ.

1983ರಲ್ಲಿ ಇಂದಿರಾ ಗಾಂಧಿ ಅವರ ಸರ್ಕಾರದಲ್ಲಿ ಹಣಕಾಸು ಸಚಿವರಾಗಿದ್ದ ಮುಖರ್ಜಿ ಜಿ-24 ರಾಷ್ಟ್ರಗಳನ್ನು ಮುನ್ನಡೆಸಿದ್ದರು. ಕಾಕತಾಳೀಯ ಎಂಬಂತೆ  ಮನಮೋಹನ್ ಸಿಂಗ್ ಅವರ ಸರ್ಕಾರದಲ್ಲಿಯು ಅದೇ ಹೊಣೆಗಾರಿಕೆ ನಿರ್ವಹಿಸುತ್ತಿದ್ದು, ಜಿ-24 ರಾಷ್ಟ್ರಗಳನ್ನು ಎರಡನೇ ಬಾರಿಗೆ ಮುನ್ನಡೆಸುವ ಅವಕಾಶ ಲಭಿಸಿದೆ.

ಭಾನುವಾರ ಇಲ್ಲಿ ಪ್ರಧಾನಿಯವರೊಂದಿಗೆ ಮಾತುಕತೆ ನಡೆಸಿದ ಬಳಿಕ ಪತ್ರಕರ್ತರಿಗೆ ಈ ವಿಷಯವನ್ನು ಸ್ವತಃ ಅವರೇ ತಿಳಿಸಿದರು.

`ಸಾಮಾನ್ಯವಾಗಿ ಈ ರೀತಿ ಪುನರಾವರ್ತನೆಯಾಗುವುದಿಲ್ಲ. ಆದರೆ, ಅಕಸ್ಮಾತ್ ಆಗಿ ಇಂತಹದ್ದೊಂದು ಸಂದರ್ಭ ಮರುಕಳಿಸಿದೆ~ ಎಂದು ಅವರು ಹೇಳಿದರು.