5 ಸಾವಿರ ಆಮೆ ಮರಿ ಸಾಗಣೆ: ಬಂಧನ

ಸಿಂಗಪುರ (ಪಿಟಿಐ): ಐದು ಸಾವಿರ ಆಮೆ ಮರಿಗಳನ್ನು ಅಕ್ರಮವಾಗಿ ಸಾಗಿಸುತ್ತಿದ್ದ ನಾಲ್ವರು ಭಾರತೀಯರನ್ನು ಮಲೇಷ್ಯಾದಲ್ಲಿ ಬಂಧಿಸಲಾಗಿದೆ.

5,255 ಆಮೆ ಮರಿಗಳನ್ನು ವಶಪಡಿಸಿಕೊಂಡಿರುವ ಮಲೇಷ್ಯಾ ಸುಂಕ ಇಲಾಖೆ ಅಧಿಕಾರಿಗಳು ದೂರು ದಾಖಲಿಸಿಕೊಂಡಿದ್ದಾರೆ.

ಈ ಆಮೆಗಳನ್ನು ಜೂನ್ 20ರಂದು ಕ್ವಾಲಲಾಂಪೂರ್‌ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ವಶಪಡಿಸಿಕೊಳ್ಳಲಾಗಿದೆ ಎಂದು ಕೇಂದ್ರೀಯ ಸುಂಕ ಇಲಾಖೆಯ ಕೇಂದ್ರ ಭಾಗದ ನಿರ್ದೇಶಕ ದಾತುಕ್ ಜುಲ್ಕುರಿಯನ್‌ ಮೊಹಮದ್‌ ಯೂಸೂಫ್‌ ಹೇಳಿದ್ದಾರೆ.

ಚೀನಾದ ಗಂಗುಜುವಾದಿಂದ ಬಂದಿದ್ದ ಇಬ್ಬರ ಲಗೇಜುಗಳನ್ನು ತಪಾಸಣೆ ಮಾಡಿದಾಗ ಆಮೆಗಳು ಪತ್ತೆಯಾಗಿವೆ. ಸೂಟ್‌ಕೇಸ್‌ ಒಳಗೆ ಬಾಕ್ಸ್‌ವೊಂದರಲ್ಲಿ ಇಟ್ಟಿದ್ದ ಕೆಂಪು ಬಣ್ಣದ ಮರಿಗಳನ್ನು ವಿಮಾನ ನಿಲ್ದಾಣದಲ್ಲಿ ತಪಾಸಣೆ ವೇಳೆ ವಶಪಡಿಸಿಕೊಳ್ಳಲಾಗಿದೆ ಎಂದು ತಿಳಿಸಿದ್ದಾರೆ.

ಸೂಟ್‌ಕೇಸ್‌ನಲ್ಲಿ ಗಾಳಿಬೆಳಕಿನ ವ್ಯವಸ್ಥೆ ಹಾಗೂ ಅವುಗಳಿಗೆ ಆಹಾರ ಸಿಗದ ಕಾರಣ ಮರಿಗಳು ಬಳಲಿ ಹಲವು ಸಾವನ್ನಪ್ಪಿವೆ ಎಂದು ತಿಳಿಸಿದ್ದಾರೆ.

ಇನ್ನೊಂದು ಪ್ರಕರಣದಲ್ಲಿ 14 ಕಿ. ಗ್ರಾಂ ಮಾದಕ ವಸ್ತು ಇಟ್ಟುಕೊಂಡಿದ್ದ ಆರೋಪದ ಮೇಲೆ ಇಬ್ಬರು ಭಾರತೀಯರನ್ನು ಬಂಧಿಸಲಾಗಿದೆ.