ಬಾಲ್ಯವಿವಾಹ: ಭಾರತ ಸೇರಿ ಐದು ದೇಶಗಳಲ್ಲಿನ ಪ್ರಮಾಣ ಶೇ 50

ನವದೆಹಲಿ: ವಿಶ್ವದಲ್ಲಿ ನಡೆಯುವ ಬಾಲ್ಯವಿವಾಹಗಳ ಪೈಕಿ ಶೇ 50ರಷ್ಟು ಪ್ರಕರಣಗಳು ಭಾರತ ಸೇರಿದಂತೆ ಐದು ರಾಷ್ಟ್ರಗಳಲ್ಲಿ ವರದಿಯಾಗುತ್ತವೆ ಎಂದು ಯುನಿಸೆಫ್‌ ಹೇಳಿದೆ.

ಅಂತರರಾಷ್ಟ್ರೀಯ ಮಹಿಳಾ ದಿನಾಚರಣೆ ಸಂದರ್ಭದಲ್ಲಿ ಯುನಿಸೆಫ್‌ ಬಿಡುಗಡೆ ಮಾಡಿರುವ ‘ಕೋವಿಡ್‌–19: ಬಾಲ್ಯವಿವಾಹ ವಿರುದ್ಧದ ಹೋರಾಟದ ಪ್ರಗತಿಗೆ ಅಪಾಯ’ ಎಂಬ ವಿಶ್ಲೆಷಣಾತ್ಮಕ ವರದಿಯಲ್ಲಿ ಈ ಅಂಶ ಇದೆ.

‘ಬಾಲ್ಯವಿವಾಹ ತಡೆಯಲು ಸಾಕಷ್ಟು ಹೋರಾಟ ನಡೆದಿದ್ದರೂ, ಈ ದಶಕದ ಅಂತ್ಯದ ವೇಳೆಗೆ ಒಂದು ಕೋಟಿ ಬಾಲ್ಯವಿವಾಹಗಳು ನೆರವೇರುವ ಅಪಾಯ ತಪ್ಪಿದ್ದಲ್ಲ’ ಎಂದು ವರದಿ ಆತಂಕ ವ್ಯಕ್ತಪಡಿಸಿದೆ.

ಬಾಲ್ಯವಿವಾಹಕ್ಕೆ ಒಳಗಾಗಿ, ಸದ್ಯ ಬದುಕು ಸಾಗಿಸುತ್ತಿರುವ ಮಹಿಳೆಯರ ಸಂಖ್ಯೆ 65 ಕೋಟಿ. ಈ ಪೈಕಿ ಶೇ 50ರಷ್ಟು ಮಹಿಳೆಯರು ಬಾಂಗ್ಲಾದೇಶ, ಬ್ರೆಜಿಲ್‌, ಇಥಿಯೋಪಿಯಾ, ಭಾರತ ಹಾಗೂ ನೈಜೀರಿಯಾಕ್ಕೆ ಸೇರಿದವರಾಗಿದ್ದಾರೆ ಎಂದೂ ವರದಿಯಲ್ಲಿ ವಿವರಿಸಲಾಗಿದೆ.

‘ಒಂದು ವರ್ಷ ಕಾಲ ಇಡೀ ಜಗತ್ತನ್ನು ಕೋವಿಡ್‌ ಪಿಡುಗು ಬಾಧಿಸಿದೆ. ಈ ಅವಧಿಯಲ್ಲಿ ಬಾಲಕಿಯರು ಹಾಗೂ ಅವರ ಕುಟುಂಬಗಳನ್ನು ಈ ಅನಿಷ್ಟ ಪದ್ಧತಿಯಿಂದ ರಕ್ಷಿಸುವುದು ಇಂದಿನ ತುರ್ತು ಅಗತ್ಯ. ಇದಕ್ಕಾಗಿ ಶಾಲೆಗಳನ್ನು ಪುನಃ ಆರಂಭಿಸಬೇಕು, ಬಾಲ್ಯವಿವಾಹ ತಡೆಗೆ ಸಂಬಂಧಿಸಿದ ಕಾನೂನುಗಳನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸಬೇಕು, ಆರೋಗ್ಯ ಸೇವೆಗೆ ಒತ್ತು ನೀಡಬೇಕು’ ಎಂದು ಯುನಿಸೆಫ್‌ನ ಕಾರ್ಯನಿರ್ವಾಹಕ ನಿರ್ದೇಶಕಿ ಹೆನ್ರೀಟಾ ಫೋರ್‌ ಪ್ರತಿಪಾದಿಸುತ್ತಾರೆ.