ಅಪ್ಪುಗೆಗೂ, ಭಾವನೆಗಳಿಗೂ ಇದೆ ನಂಟು: ಅಧ್ಯಯನ

ಬರ್ಲಿನ್: ಒಬ್ಬರು ಮತ್ತೊಬ್ಬರನ್ನು ಯಾವ ಕಡೆ (ಎಡ ಅಥವಾ ಬಲ) ಅಪ್ಪಿಕೊಳ್ಳುತ್ತಾರೆ ಎಂದು ನಿರ್ಧರಿಸುವಲ್ಲಿ ಭಾವನೆಗಳು ನಿರ್ಣಾಯಕ ಪಾತ್ರ ವಹಿಸುತ್ತವೆ ಎಂದು ಜರ್ಮನಿಯ ಬೋಚಮ್ ವಿಶ್ವವಿದ್ಯಾಲಯದ ಅಧ್ಯಯನ ವರದಿ ಅಭಿಪ್ರಾಯಪಟ್ಟಿದೆ.

‘ಸಾಮಾನ್ಯ ಸಂದರ್ಭಗಳಿಗೆ ಹೋಲಿಸಿದರೆ, ಭಾವತೀವ್ರತೆಯ ಪ್ರಸಂಗಗಲ್ಲಿ ಜನರು ಪರಸ್ಪರ ಎಡಗಡೆಯಿಂದ ಅಪ್ಪಿಕೊಳ್ಳುತ್ತಾರೆ’ ಎಂದು ಸಂಶೋಧಕರು ಹೇಳಿದ್ದಾರೆ. ಅಪ್ಪುಗೆಯ ವೇಳೆ ಕೈ ಹಾಗೂ ಪಾದಗಳ ಚಲನೆಯನ್ನೂ ಸೂಕ್ಷ್ಮವಾಗಿ ಗಮನಿಸಲಾಗಿದೆ.

ಬೀದಿಯಲ್ಲಿ ಹೋಗುವಾಗ ಚಿತ್ರನಟರು ಅಪರಿಚಿತರಿಗೆ ಕಣ್ಣುಮುಚ್ಚಿಕೊಂಡವರ ರೀತಿ ನೀಡುವ ಅಪ್ಪುಗೆಯ ಸುಮಾರು 500 ದೃಶ್ಯಗಳನ್ನೂ ಸಂಶೋಧಕರು ವಿಶ್ಲೇಷಣೆಗೆ ಒಳಪಡಿಸಿದ್ದಾರೆ.

‘ಸಾಮಾನ್ಯ ಸಂದರ್ಭಗಳಲ್ಲಿ ಬಲಗಡೆಯಿಂದ ಅಪ್ಪಿಕೊಳ್ಳಲು ಜನರು ಮುಂದಾಗುತ್ತಾರೆ’ ಎಂದು ಹಿಂದಿನ ಅಧ್ಯಯನ ವರದಿಗಳನ್ನು ಆಧರಿಸಿ ಸೈಕಲಾಜಿಕಲ್ ರಿಸರ್ಜ್ ಪತ್ರಿಕೆಯಲ್ಲಿ ಪ್ರಕಟವಾಗಿರುವ ವರದಿಯು ಇದನ್ನು ದೃಢಪಡಿಸಿದೆ.

‘ಅಪ್ಪುಗೆಯು ಹುಟ್ಟಿನಿಂದಲೂ ಮನುಷ್ಯರ ನಡುವಿನ ಸಾಮಾಜಿಕ ಸಂವಹನದ ಭಾಗವಾಗಿದೆ. ಜನರು ವಿವಿಧ ಸಂದರ್ಭಗಳಲ್ಲಿ ಅಪ್ಪುಗೆ ಮೂಲಕ ಪ್ರೀತಿ, ವಾತ್ಸಲ್ಯ ವ್ಯಕ್ತಪಡಿಸುತ್ತಾರೆ’ ಎಂದಿದೆ ವರದಿ.