ನೈಜರ್ ಜಿರಾಫೆ ಪಾರ್ಕ್‌ಗೆ ಬಂದಿದ್ದ ಫ್ರಾನ್ಸ್ ಪ‍್ರವಾಸಿಗರೂ ಸೇರಿ 8 ಮಂದಿ ಕೊಲೆ
ನೈಜರ್: ಅಪರಿಚಿತ ವ್ಯಕ್ತಿಯಿಂದ ಗುಂಡಿನ ದಾಳಿ
ನಿಯಾಮೆ(ನೈಜರ್): ಇಲ್ಲಿಗೆ ಸಮೀಪದ ವನ್ಯಜೀವಿಧಾಮವೊಂದರಲ್ಲಿಭಾನುವಾರ ಅಪರಿಚಿತ ವ್ಯಕ್ತಿಯೊಬ್ಬ ಆರು ಮಂದಿ ಫ್ರಾನ್ಸ್ ಪ್ರಜೆಗಳು ಮತ್ತು ಇಬ್ಬರು ನೈಜೀರಿಯನ್‌ ಗೈಡ್‌ಗಳನ್ನು ಗುಂಡಿಕ್ಕಿ ಕೊಂದಿದ್ದಾನೆ.
ವನ್ಯಜೀವಿಧಾಮದಲ್ಲಿರುವ ಕೌರೆ ಎಂಬತಿ ಕಾಯ್ದಿಟ್ಟ ಜಿರಾಫೆ ಸಂರಕ್ಷಣಾ ಪ್ರದೇಶದಲ್ಲಿ ಈ ದಾಳಿ ನಡೆದಿದೆ ಎಂದು ನೈಜರ್‌ನ ಸಚಿವರೊಬ್ಬರು ಸುದ್ದಿ ಸಂಸ್ಥೆಗೆ ತಿಳಿಸಿದ್ದಾರೆ. ಫ್ರಾನ್ಸ್ ಅಧ್ಯಕ್ಷರ ಕಚೇರಿಯೂ ಈ ವಿಷಯವನ್ನು ದೃಢಪಡಿಸಿದೆ.
ಈ ಪ್ರದೇಶವು ಸಂರಕ್ಷಿತ ರಾಷ್ಟ್ರೀಯ ಉದ್ಯಾನವನವಾಗಿದ್ದು, ರಾಜಧಾನಿಯ ಆಗ್ನೇಯಕ್ಕೆ 70 ಕಿಲೋಮೀಟರ್ (45 ಮೈಲಿ) ದೂರದಲ್ಲಿ. ದಟ್ಟವಾದ ಸಸ್ಯಸಂಪತ್ತನ್ನು ಹೊಂದಿದ್ದು, ಎತ್ತರದ ಮರಗಳಿವೆ. ವಿಶಿಷ್ಟ ಜಿರಾಫೆಗಳನ್ನು ನೋಡುವುದಕ್ಕಾಗಿಯೇ ಪ್ರತಿವರ್ಷ ನೂರಾರು ಜನರು ಈ ವನ್ಯಜೀವಿ ಧಾಮಕ್ಕೆ ಭೇಟಿ ನೀಡುತ್ತಾರೆ. ಈ ಉದ್ಯಾನವು ಟಿಲ್ಲಾಬೆರಿ ಪ್ರದೇಶದಲ್ಲಿದೆ. ಇಲ್ಲಿರುವ ಐಎಸ್‌ ಉಗ್ರರೊಂದಿಗೆ ಸಂಪರ್ಕ ಹೊಂದಿರುವ ಜಿಹಾದಿಗಳು 2017ರಲ್ಲಿ ನಾಲ್ವರು ಅಮೆರಿಕ ನಾಗರಿಕರು ಮತ್ತು ಇಬ್ಬರು ನೈಜೀರಿಯನ್‌ ಪ್ರಜೆಗಳನ್ನು ಹತ್ಯೆ ಮಾಡಿದ್ದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.