ಹಾರಾಟದಲ್ಲಿರುವಾಗಲೇ ವಿಮಾನಕ್ಕೆ ಬೆಂಕಿ: ವಿಡಿಯೊ ನೋಡಿದರೆ ಎದೆ ಝಲ್‌ ಎನ್ನುತ್ತೆ!

ಮಿಯಾಮಿ: ‘ಅಟ್ಲಾಸ್‌ ಏರ್‌’ ಸಂಸ್ಥೆಯ ಬೋಯಿಂಗ್‌–747-8 ಕಾರ್ಗೊ ವಿಮಾನ ಟೇಕಾಫ್‌ ಆದ ಕೆಲವೇ ಕ್ಷಣದಲ್ಲಿ ಬೆಂಕಿ ಹೊತ್ತಿಕೊಂಡಿದ್ದು ಸಿಬ್ಬಂದಿ ಸುರಕ್ಷಿತವಾಗಿ ತುರ್ತು ಭೂಸ್ಪರ್ಶ ಮಾಡಿಸಿದ್ದಾರೆ.

ಈ ಘಟನೆ ಅಮೆರಿಕದ ಮಿಯಾಮಿಯಿಂದ ವರದಿಯಾಗಿದೆ.

ವಿಮಾನ ಹಾರಾಟದಲ್ಲಿರುವಾಗಲೇ ಎಡ ರೆಕ್ಕೆಗೆ ಬೆಂಕಿ ಹೊತ್ತಿಕೊಂಡಿದ್ದ ದೃಶ್ಯವೊಂದು ಸಾಮಾಜಿಕ ಮಾಧ್ಯಮದಲ್ಲಿ ಹರಿದಾಡುತ್ತಿದೆ. ಆದರೆ ಇದು ಬೋಯಿಂಗ್‌ ವಿಮಾನದ ದೃಶ್ಯವೇ ಎಂಬುದರ ಬಗ್ಗೆ ಖಾತ್ರಿಯಾಗಿಲ್ಲ ಎಂದು ವರದಿಗಳು ಹೇಳಿವೆ.

ಕಾರ್ಗೊ ವಿಮಾನದ ಎಂಜಿನ್‌ ದೋಷದ ಕಾರಣಕ್ಕೆ ಮಿಯಾಮಿ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಸಿಬ್ಬಂದಿ ತುರ್ತು ಸಂದರ್ಭದ ಪ್ರಮಾಣಿತ ಕಾರ್ಯವಿಧಾನಗಳನ್ನು ಅನುರಿಸಿ ವಿಮಾನವನ್ನು ಸುರಕ್ಷಿತವಾಗಿ ಇಳಿಸಿದ್ದಾರೆ‘ ಎಂದು ಅಟ್ಲಾಸ್‌ ಏರ್‌ ತಿಳಿಸಿದೆ.

ಘಟನೆಯಲ್ಲಿ ಯಾರಿಗೂ ಹಾನಿಯಾಗಿಲ್ಲ ಎಂದು ವಿಮಾನ ನಿಲ್ದಾಣದ ಅಧಿಕಾರಿಗಳು ತಿಳಿಸಿದ್ದಾರೆ. ಘಟನೆಗೆ ಕಾರಣವೇನು ಎಂಬುದನ್ನು ಪತ್ತೆ ಮಾಡಲು ತನಿಖೆ ನಡೆಸುವುದಾಗಿಯೂ ಅವರು ಹೇಳಿದ್ದಾರೆ.