ಚೀನಾ ಡ್ರೋನ್ ಹಾರಟ ಪ್ರಚೋದನಾಕಾರಿ: ತೈವಾನ್ ಆಕ್ರೋಶ

ತೈಪೆ: ತನ್ನ ನಿಯಂತ್ರಣದಲ್ಲಿರುವ ದ್ವೀಪವೊಂದರ ಮೇಲೆ ಚೀನಾದ ಕಣ್ಗಾವಲು ಡ್ರೋನ್‌ವೊಂದು ಶನಿವಾರ ಹಾರಾಟ ನಡೆಸಿದೆ ಎಂದು ಹೇಳಿರುವ ತೈವಾನ್‌ ರಕ್ಷಣಾ ಸಚಿವಾಲಯ, ‘ಇದು ಪ್ರಚೋದನಕಾರಿ ಮತ್ತು ಬೇಜವಾಬ್ದಾರಿಯುತ ನಡೆ’ ಎಂದು ಆಕ್ರೋಶ ವ್ಯಕ್ತಪಡಿಸಿದೆ.

‘ಪ್ರಟಸ್‌ ದ್ವೀಪದ ಬಳಿ ಚೀನಾದ ಡ್ರೋನ್‌ ಎಂಟು ನಿಮಿಷ ಹಾರಾಟ ನಡೆಸಿದೆ. ಅಂತರರಾಷ್ಟ್ರೀಯ ಚಾನೆಲ್‌ಗಳ ಮೂಲಕ ನಾವು ಎಚ್ಚರಿಕೆ ನೀಡಿದ ಬಳಿಕ ಅದು ಹೊರಟುಹೋಯಿತು’ ಎಂದು ತೈವಾನ್ ತಿಳಿಸಿದೆ.

‘ಚೀನಾದ ನಡೆಯು ಖಂಡನಾರ್ಹ. ಇದು ಪ್ರಾದೇಶಿಕ ಶಾಂತಿ ಮತ್ತು ಸ್ಥಿರತೆಗೆ ಧಕ್ಕೆ ತರುತ್ತದೆ. ಅಂತರರಾಷ್ಟ್ರೀಯ ಕಾನೂನಿನ ಉಲ್ಲಂಘನೆಯೂ ಆಗಿದೆ’ ಎಂದೂ ಹೇಳಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಚೀನಾ ಸೇನೆಯ ವಕ್ತಾರರು, ‘ತರಬೇತಿ ಉದ್ದೇಶದಿಂದ ಡ್ರೋನ್‌ಗಳು ಹಾರಾಟ ನಡೆಸಿವೆ’ ಎಂದು ತಿಳಿಸಿದ್ದಾರೆ.