ಕೋವಿಡ್‌ ಸಮಸ್ಯೆ: ಭಾರತಕ್ಕೆ ನೆರವು ನೀಡಲು ಸಿದ್ಧ –ಚೀನಾ

ಬೀಜಿಂಗ್‌: ಕೋವಿಡ್‌ ಪ್ರಕರಣಗಳ ಏರಿಕೆ ಹಿನ್ನೆಲೆಯಲ್ಲಿ ಪರಿಸ್ಥಿತಿಯನ್ನು ಎದುರಿಸುವ ಕುರಿತಂತೆ ತಾನು ಭಾರತದ ಜೊತೆಗೆ ಸಂಪರ್ಕದಲ್ಲಿ ಇರುವುದಾಗಿ ಚೀನಾ ಶುಕ್ರವಾರ ಹೇಳಿದೆ. ಭಾರತ ಮತ್ತು ಭಾರತೀಯರಿಗೆ ಸಮಸ್ಯೆ ಎದುರಿಸಲು ಅಗತ್ಯ ನೆರವು ಒದಗಿಸಲು ತಾನು ಸಿದ್ಧವಿರುವುದಾಗಿಯೂ ಹೇಳಿದೆ.

ಚೀನಾದ ವಿದೇಶಾಂಗ ಸಚಿವಾಲಯದ ವಕ್ತಾರ ಝಾವೊ ಲಿಜಿಯನ್‌ ಅವರು, ಭಾರತದಲ್ಲಿ ಇತ್ತೀಚಿಗೆ ಕೋವಿಡ್‌ ಪ್ರಕರಣಗಳು ತೀವ್ರಗತಿಯಲ್ಲಿ ಏರಿಕೆ ಆಗಿರುವುದಕ್ಕೆ ನಮಗೆ ತೀವ್ರ ಅಸಮಾಧಾನವಿದೆ ಎಂದು ಹೇಳಿದರು.

‘ಭಾರತದ ಅಗತ್ಯವನ್ನು ಪರಿಗಣಿಸಿ ನಾವು ನೆರವು ನೀಡಲಿದ್ದೇವೆ. ಈ ಸಂಬಂಧ ನವದೆಹಲಿಯ ಜೊತೆಗೆ ಸಂಪರ್ಕದಲ್ಲಿ ಇದ್ದೇವೆ. ಈಗಿನ ಸಮಸ್ಯೆಯಿಂದ ಭಾರತೀಯರು ಖಂಡಿತವಾಗಿ ಹೊರಗೆ ಬರುತ್ತಾರೆ ಎಂಬ ವಿಶ್ವಾಸ ನಮಗಿದೆ’ ಎಂದು ಹೇಳಿದರು.