ಟೋಕಿಯೊ: ಈ ವರ್ಷ ಜಪಾನ್ನಲ್ಲಿ ನಡೆಯಬೇಕಿರುವ ಟೊಕಿಯೊ ಒಲಿಂಪಿಕ್ ಕ್ರೀಡಾಕೂಟಕ್ಕೆ ಕೊರೊನಾ ವೈರಸ್ ಭೀತಿ ಎದುರಾಗಿದ್ದು, ಕ್ರೀಡಾಕೂಟವನ್ನು ಬೇರೆ ಕಡೆಗೆ ಸ್ಥಳಾಂತರಿಸಲಾಗುತ್ತದೆ ಎಂಬ ವದಂತಿಗಳು ಹರಿದಾಡುತ್ತಿವೆ. ಆದರೆ, ಒಲಿಂಪಿಕ್ ಸಿದ್ಧತಾ ಸಮಿತಿಯು ಎಲ್ಲ ವದಂತಿಗಳನ್ನೂ ಅಲ್ಲಗಳೆದಿದೆ.
‘ಕ್ರೀಡಾಕೂಟವನ್ನುಆಯೋಜಿಸುವ ವಿಚಾರದಲ್ಲಿ ಸಣ್ಣ ಬದಲಾವಣೆಯೂ ಇಲ್ಲ’ ಎಂದು ಟೋಕಿಯೊಒಲಿಂಪಿಕ್ ಸಿದ್ಧತಾ ಸಮಿತಿಯ ಉಪನಿರ್ದೇಶಕ ಕಸ್ತುರ ಎನ್ಯೊ ತಿಳಿಸಿದ್ದಾರೆ. ಮುಂದುವರಿದು, ವೈರಸ್ ಸಮಸ್ಯೆಯನ್ನುಈವರೆಗೂ ಎದುರಿಸುತ್ತಿದ್ದೇವೆಯಾದರೂ, ಜುಲೈ 24ರಿಂದ ಆಗಸ್ಟ್ 9ರವರೆಗೆ ನಡೆಯಲಿರುವ ಒಲಿಂಪಿಕ್ಗೆ ಯಾವುದೇ ತೊಂದರೆಯಾಗದು ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಒಲಿಂಪಿಕ್ ಸಿದ್ಧತೆಗಾಗಿ ಸುಮಾರು ₹ 8,600 ($ 12 ಬಿಲಿಯನ್) ಕೋಟಿಗೂ ಹೆಚ್ಚು ಹಣ ವ್ಯಯಿಸಿರುವ ಜಪಾನ್, ಕೊರೊನಾ ವೈರಸ್ನಿಂದಾಗಿ ಮೂಡಿರುವ ಆತಂಕವನ್ನು ದೂರಮಾಡಲು ಪ್ರಯತ್ನಿಸುತ್ತಿದೆ.
ಕ್ರೀಡಾಕೂಟವು ಆರು ತಿಂಗಳಿನಿಂದ 1 ವರ್ಷದ ಅವಧಿಯವರೆಗೆ ಮುಂದೂಡಿಕೆಯಾಗಬಹುದು ಎಂದು ಕೆಲವು ಜಪಾನ್ ಮಾಧ್ಯಮಗಳು ವರದಿ ಮಾಡಿವೆ. ಅದನ್ನು ಅಲ್ಲಗಳೆದಿರುವ ಎನ್ಯೊ, ‘ಅಂತಹ ಯಾವುದೇ ಮಾತುಕತೆ ನಡೆದಿಲ್ಲ’ ಎಂದು ತಿಳಿಸಿದ್ದಾರೆ.
‘ಕ್ರೀಡಾಕೂಟವನ್ನು ನಿಗದಿಯಂತೆ ಆಯೋಜಿಸಲು ಬದ್ಧವಾಗಿದ್ದೇವೆ’ ಎಂದು ಅಂತರರಾಷ್ಟ್ರೀಯ ಒಲಿಂಪಿಕ್ ಸಮಿತಿ ಅಧ್ಯಕ್ಷ ಥಾಮಸ್ ಬಾಚ್ಗುರುವಾರ ಹೇಳಿದ್ದರು.
ಜಾಪನ್ನಲ್ಲಿ ಸದ್ಯ 200ಕ್ಕೂ ಹೆಚ್ಚು ಕೊರೊನಾ ವೈರಸ್ ಸೋಂಕು ಪ್ರಕರಣಗಳು ಪತ್ತೆಯಾಗಿದ್ದು, 4 ಮಂದಿ ಮೃತಪಟ್ಟಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.