ಶಾಂತಿ ಒಪ್ಪಂದ ರದ್ದು: ಇಸ್ರೇಲ್‌ಗೆ ಈಜಿಪ್ಟ್‌ ಬೆದರಿಕೆ

ರಫಾ: ‘ಗಾಜಾ ಪಟ್ಟಿಯ ರಫಾ ನಗರಕ್ಕೆ ಸೇನೆಯನ್ನು ಕಳುಹಿಸಿದರೆ ನಿಮ್ಮೊಂದಿಗೆ ಮಾಡಿಕೊಂಡಿರುವ ಶಾಂತಿ ಒಪ್ಪಂದವನ್ನು ರದ್ದು ಮಾಡಬೇಕಾಗಬಹುದು’ ಎಂದು ಈಜಿಪ್ಟ್‌ ಭಾನುವಾರ ಇಸ್ರೇಲ್‌ಗೆ ಎಚ್ಚರಿಕೆ ನೀಡಿದೆ.

‘ರಫಾದಲ್ಲಿ ಗಲಭೆಯೇನಾದರೂ ಉಂಟಾದರೆ, ಈ ಪ್ರದೇಶದ ಪ್ರಮುಖ ನೆರವು ಪೂರೈಕೆ ಮಾರ್ಗವನ್ನು ಮುಚ್ಚಲಾಗುವುದು’ ಎಂದೂ ಈಜಿಪ್ಟ್‌ ಅಧಿಕಾರಿಗಳು ಹೇಳಿದ್ದಾರೆ.

‘ಪ್ಯಾಲೆಸ್ಟೀನ್‌ ಬಂಡುಕೋರರ ವಿರುದ್ಧ ಕಳೆದ ನಾಲ್ಕು ತಿಂಗಳಿನಿಂದ ನಡೆಯುತ್ತಿರುವ ಯುದ್ಧದಲ್ಲಿ ಗೆಲ್ಲಬೇಕಾದರೆ ರಫಾ ನಗರಕ್ಕೆ ಸೇನೆಯನ್ನು ಕಳುಹಿಸಬೇಕು’ ಎಂದು ಇಸ್ರೇಲ್‌ ಪ್ರಧಾನಿ ಬೆಂಜಮಿನ್‌ ನೆತನ್ಯಾಹು ಅವರು ಹೇಳಿಕೆ ನೀಡಿದ ಬೆನ್ನಲ್ಲೇ ಸುಮಾರು 50 ವರ್ಷದಿಂದ ಪ್ರಾದೇಶಿಕ ಸ್ಥಿರತೆಗೆ ಮೂಲ ಆಧಾರವಾಗಿರುವ ಕ್ಯಾಂಪ್‌ ಡೇವಿಡ್‌ ಅಕಾರ್ಡ್ಸ್ ಶಾಂತಿ ಒಪ್ಪಂದವನ್ನು ರದ್ದುಪಡಿಸುವ ಬೆದರಿಕೆಯನ್ನು ಈಜಿಪ್ಟ್ ಹಾಕಿದೆ.