ಅಮೆರಿಕ ಕ್ರೈಸ್ತರ ದೇಶ;ಇಲ್ಲೇಕೆ ಹಿಂದೂಗಳ ನಕಲಿ ದೇವರು: ರಿಪಬ್ಲಿಕನ್ ನಾಯಕನ ವಿವಾದ

ವಾಷಿಂಗ್ಟನ್‌: ‘ಅಮೆರಿಕ ಕ್ರಿಶ್ಚಿಯನ್‌ ದೇಶ. ಟೆಕ್ಸಾಸ್‌ನಲ್ಲಿ ಸುಳ್ಳು ಹಿಂದೂ ದೇವರ ಸುಳ್ಳು ಪ್ರತಿಮೆಗೆ ನಾವು ಏಕೆ ಅನುಮತಿಸುತ್ತಿದ್ದೇವೆ?’ ಎಂಬ ಟೆಕ್ಸಾಸ್‌ನ ರಿಪಬ್ಲಿಕನ್‌ ಪಕ್ಷದ ನಾಯಕ ಅಲೆಕ್ಸಾಂಡರ್‌ ಡಂಕನ್ ಅವರ ಹೇಳಿಕೆ ಭಾರಿ ವಿವಾದಕ್ಕೆ ಕಾರಣವಾಗಿದೆ.

ಟೆಕ್ಸಾಸ್‌ನಲ್ಲಿ ನಿರ್ಮಿಸಿರುವ 90 ಅಡಿ ಎತ್ತರದ ಹನುಮಾನ್‌ ಪ್ರತಿಮೆಯ ಕುರಿತ ಡಂಕನ್ ಮಾತಿಗೆ ಅಮೆರಿಕದಲ್ಲಿನ ಹಿಂದೂ ಸಂಘಟನೆ ತೀವ್ರ ವಿರೋಧ ವ್ಯಕ್ತಪಡಿಸಿದೆ.

ಸಾಮಾಜಿಕ ಮಾಧ್ಯಮ ಎಕ್ಸ್‌ನಲ್ಲಿ ಪೋಸ್ಟ್‌ ಹಂಚಿಕೊಂಡಿರುವ ಅಲೆಕ್ಸಾಂಡರ್‌ ಡಂಕನ್, ಹನುಮಾನ್‌ ಪ್ರತಿಮೆಯ ವಿಡಿಯೊವನ್ನೂ ಹಂಚಿಕೊಂಡಿದ್ದಾರೆ. ಇನ್ನೊಂದು ಪೋಸ್ಟ್‌ನಲ್ಲಿ ಬೈಬಲ್ ಅನ್ನು ಉಲ್ಲೇಖಿಸಿ, ‘ನನ್ನನ್ನು ಹೊರತುಪಡಿಸಿ ನಿಮಗೆ ಬೇರೆ ದೇವರು ಇರಬಾರದು. ನೀವು ನಿಮಗಾಗಿ ಯಾವುದೇ ರೀತಿಯ ವಿಗ್ರಹವನ್ನು ಸ್ವರ್ಗದಲ್ಲಿ, ಭೂಮಿಯಲ್ಲಿ ಅಥವಾ ಸಮುದ್ರದಲ್ಲಿ ಮಾಡಿಕೊಳ್ಳಬಾರದು’ ಎಂದಿರುವುದಾಗಿ ಬರೆದುಕೊಂಡಿದ್ದಾರೆ.

ಅಲೆಕ್ಸಾಂಡರ್‌ ಡಂಕನ್ ಹೇಳಿಕೆಗೆ ಸಾಮಾಜಿಕ ಮಾಧ್ಯಮದಲ್ಲಿ ವಿರೋಧ ವ್ಯಕ್ತವಾಗಿದೆ. ‘ಹಿಂದೂ ವಿರೋಧಿ ಮತ್ತು ಪ್ರಚೋದನಕಾರಿ’ ಹೇಳಿಕೆ ಎಂದು ಅಮೆರಿಕದಲ್ಲಿನ ಹಿಂದೂ ಫೌಂಡೇಶನ್‌ ಆಕ್ರೋಶ ವ್ಯಕ್ತಪಡಿಸಿದೆ. ಹೇಳಿಕೆ ಎಂದಿದೆ. 

ಅಲ್ಲದೆ, ಈ ಕುರಿತು ಹೇಳಿಕೆ ಬಿಡುಗಡೆ ಮಾಡುವಂತೆ ಟ್ರಂಪ್‌ ನಾಯಕತ್ವದ ರಿಪಬ್ಲಿಕನ್‌ ಪಕ್ಷವನ್ನು ಒತ್ತಾಯಿಸಿದೆ. ‘ನಿಮ್ಮ ಪಕ್ಷದ ಸೆನೆಟ್ ಅಭ್ಯರ್ಥಿಯು ಹಿಂದೂ ವಿರೋಧಿ ಮತ್ತು ಪ್ರಚೋದನಾಕಾರಿ ಪೋಸ್ಟ್‌ ಹಂಚಿಕೊಂಡಿದ್ದಾರೆ. ನಿಮ್ಮ ನಾಯಕನ ವರ್ತನೆಯನ್ನು ಸರಿಪಡಿಕೊಳ್ಳುವಂತೆ ಸಲಹೆ ನೀಡುವಿರಾ’ ಎಂದು ಎಚ್ಚರಿಕೆ ನೀಡಿದೆ.