ಲಂಡನ್: 2019ರಲ್ಲಿ 10 ಹೊಸ ಶಸ್ತ್ರಾಸ್ತ್ರಗಳನ್ನು ಸೇರ್ಪಡೆಗೊಳಿಸುವ ಮೂಲಕ ಭಾರತವು ತನ್ನ ಅಣು ಶಸ್ತ್ರಾಸ್ತ್ರ ಸಂಗ್ರಹವನ್ನು ಹಿಗ್ಗಿಸಿಕೊಂಡಿದ್ದರೂ, ಚೀನಾ ಮತ್ತು ಪಾಕಿಸ್ತಾನಕ್ಕೆ ಹೋಲಿಸಿದರೆ ಭಾರತದಲ್ಲಿ ಸಿಡಿತಲೆಗಳ(ವಾರ್ಹೆಡ್) ಸಂಖ್ಯೆ ಕಡಿಮೆ ಇದೆ ಎಂದು ವರದಿಯೊಂದರಿಂದ ಬಹಿರಂಗವಾಗಿದೆ.
ಸ್ವೀಡನ್ ಮೂಲದ ‘ದಿ ಸ್ಟಾಕ್ಹೊಮ್ ಇಂಟರ್ನ್ಯಾಷನಲ್ ಪೀಸ್ ರಿಸರ್ಚ್ ಇನ್ಸ್ಟಿಟ್ಯೂಟ್’ (ಎಸ್ಐಪಿಆರ್ಐ) ವರದಿ ಅನ್ವಯ, ‘2019ರಲ್ಲಿ ಭಾರತ ಹಾಗೂ ಚೀನಾ ತನ್ನ ಅಣು ಶಸ್ತ್ರಾಸ್ತ್ರ ಸಂಗ್ರಹವನ್ನು ಹೆಚ್ಚಿಸಿಕೊಂಡಿದೆ. ಚೀನಾ ಬಳಿ ಒಟ್ಟು 320 ಸಿಡಿತಲೆಗಳು ಇದ್ದರೆ, ಪಾಕಿಸ್ತಾನದ ಬಳಿ 160 ಸಿಡಿತಲೆಗಳಿವೆ. ಭಾರತದ ಬತ್ತಳಿಕೆಯಲ್ಲಿ 150 ಸಿಡಿತಲೆಗಳು ಇವೆ’ ಎಂದು ಉಲ್ಲೇಖಿಸಲಾಗಿದೆ.
2019ರ ವರದಿಯ ಅನ್ವಯ ಚೀನಾ ಬಳಿ 290 ಸಿಡಿತಲೆಗಳು ಇದ್ದವು. ಭಾರತದಲ್ಲಿ 130–140 ಹಾಗೂ ಪಾಕಿಸ್ತಾನದಲ್ಲಿ 150–160 ಸಿಡಿತಲೆಗಳು ಇವೆ ಎಂದು ಸಿಐಪಿಆರ್ಐ ತಿಳಿಸಿತ್ತು.
‘ತನ್ನ ಅಣು ಶಸ್ತ್ರಾಸ್ತ್ರ ಸಂಗ್ರಹವನ್ನು ಆಧುನೀಕರಣಗೊಳಿಸುವತ್ತ ಚೀನಾ ಹೆಜ್ಜೆ ಇರಿಸಿದೆ. ಚೀನಾ ಇದೇ ಮೊದಲ ಬಾರಿಗೆ ಭೂಮಿಯಿಂದ, ಸಬ್ಮೆರಿನ್ಗಳಿಂದ ಮತ್ತು ಯುದ್ಧವಿಮಾನಗಳಿಂದ ಉಡಾವಣೆಗೊಳ್ಳುವ ಅಣು ಕ್ಷಿಪಣಿಗಳ ಅಭಿವೃದ್ಧಿಯತ್ತ(ನ್ಯೂಕ್ಲಿಯರ್ ಟ್ರಯಾಡ್) ಚಿತ್ತಹರಿಸಿದೆ’ ಎಂದು ವರದಿ ಎಚ್ಚರಿಸಿದೆ.
***
ಅಂಕಿ ಅಂಶ
5,800:ಅಮೆರಿಕದ ಸಂಗ್ರಹದಲ್ಲಿರುವ ಸಿಡಿತಲೆಗಳು
6,375: ರಷ್ಯಾ ಬಳಿ ಇರುವ ಸಿಡಿತಲೆಗಳು
13,400: ಹತ್ತು ಅಣು ರಾಷ್ಟ್ರಗಳ ಬಳಿ2020ರ ಆರಂಭದಲ್ಲಿ ಇರುವ ಅಣು ಶಸ್ತ್ರಾಸ್ತ್ರಗಳು
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.