ಮಾಲ್ದೀವ್ಸ್‌ನಲ್ಲಿ ಜಲಸಾರಿಗೆ ಯೋಜನೆ: ಒಪ್ಪಂದಕ್ಕೆ ಭಾರತ ಸಹಿ

ಮಾಲೆ: ದ್ವೀಪರಾಷ್ಟ್ರ ಮಾಲ್ದೀವ್ಸ್‌ನಲ್ಲಿ ಜಲ(ದೋಣಿ) ಸಾರಿಗೆ ವ್ಯವಸ್ಥೆಯನ್ನು ಇನ್ನಷ್ಟು ಸುಧಾರಿಸಲು 10 ಕೋಟಿ ಎಂವಿಆರ್ (ಸುಮಾರು ₹55 ಕೋಟಿ) ನೆರವಿನ 13 ಒಡಂಬಡಿಕೆಗಳಿಗೆ ಭಾರತ ಸಹಿ ಹಾಕಿದೆ. ಸಮುದ್ರ ಸಾರಿಗೆ ಸಂಪರ್ಕ ವಿಸ್ತರಣೆ ಮತ್ತು ಸಮುದಾಯದ ಜೀವನ ಸುಧಾರಣೆಗೆ ಇದು ಸಹಕಾರಿಯಾಗಲಿದೆ.

ಮಾಲ್ದೀವ್ಸ್‌ ವಿದೇಶಾಂಗ ಸಚಿವ ಅಬ್ದುಲ್ಲಾ ಖಲೀಲ್‌ ಮತ್ತು ಅಲ್ಲಿರುವ ಭಾರತದ ಹೈಕಮಿಷನರ್ ಜಿ.ಬಾಲಸುಬ್ರಮಣಿಯನ್, ಭಾರತ ಅನುದಾನದ 13 ಯೋಜನೆಗಳ ಒಪ್ಪಂದಕ್ಕೆ ಭಾನುವಾರ ಸಹಿ ಹಾಕಿದರು. ಎರಡೂ ದೇಶಗಳ ಸಂಬಂಧ ಗಟ್ಟಿಗೊಳಿಸುವಲ್ಲಿ ಈ ಒಪ್ಪಂದ ಮೈಲುಗಲ್ಲು ಎಂದು ಮಾಲ್ದೀವ್ಸ್‌ ವಿದೇಶಾಂಗ ಇಲಾಖೆ ಹೇಳಿತು. ‘ಮಾಲ್ದೀವ್ಸ್‌ ಜತೆ ಪಾಲುದಾರನಾಗಲು ಭಾರತ ಸರ್ಕಾರ ಸಂತೋಷಪಡುತ್ತದೆ’ ಎಂದು ಭಾರತದ ಹೈಕಮಿಷನರ್ ಕಚೇರಿ ‌‘ಎಕ್ಸ್‌’ ಪೋಸ್ಟ್‌ನಲ್ಲಿ ತಿಳಿಸಿದೆ.

ಮಾಲ್ದೀವ್ಸ್‌ನ ದ್ವೀಪಗಳ ನಡುವಿನ ಸಂಚಾರವನ್ನು ಚುರುಕುಗೊಳಿಸುವ ಜಲ ಸಾರಿಗೆ ಸಂಪರ್ಕ ಒದಗಿಸಲು 13 ಯೋಜನೆಗಳು ನೆರವಾಗಲಿವೆ ಎಂದು ಅಲ್ಲಿನ ಸಾರಿಗೆ ಸಚಿವರು ತಿಳಿಸಿದ್ದಾರೆ.