ಭಾರತ–ಮಾಲ್ದೀವ್ಸ್‌ ಸಂಬಂಧ ವೃದ್ಧಿಗೆ ಒತ್ತು: ಪ್ರಧಾನಿ ನರೇಂದ್ರ ಮೋದಿ

ಮಾಲೆ : ‘ಮಾಲ್ದೀವ್ಸ್‌ನೊಂದಿಗೆ ಇನ್ನಷ್ಟು ಬಲವಾದ ಬಾಂಧವ್ಯ ವೃದ್ಧಿಸಿಕೊಳ್ಳಲು ಭಾರತ ಎದುರು ನೋಡುತ್ತಿದೆ’ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದರು.

ಪ್ರಧಾನಿ ಮೋದಿ ಅವರು ಎರಡು ದಿನಗಳ ಮಾಲ್ದೀವ್ಸ್‌ ಪ್ರವಾಸ ಕೈಗೊಂಡಿದ್ದರು. ಈ ವೇಳೆ ಅವರು ಇಲ್ಲಿನ ಉಪಾಧ್ಯಕ್ಷ ಉಝ್‌ ಹುಸೇನ್‌ ಮೊಹಮ್ಮದ್‌ ಲತೀಫ್‌ ಸೇರಿದಂತೆ ಹಲವು ಪ್ರಮುಖ ನಾಯಕರನ್ನು ಭೇಟಿ ಮಾಡಿದರು.

ಎರಡೂ ದೇಶಗಳ ಸಂಬಂಧವನ್ನು ಗಟ್ಟಿಗೊಳಿಸಿಕೊಳ್ಳುವ ಸಂಬಂಧ ಲತೀಫ್‌ ಅವರೊಂದಿಗೆ ಮಹತ್ವದ ಮಾತುಕತೆಯನ್ನೂ ಮೋದಿ  ನಡೆಸಿದರು.

ಮಾಲ್ದೀವ್ಸ್ ಸಂಸತ್ತಿನ ಸ್ಪೀಕರ್‌ ಅಬ್ದುಲ್‌ ರೆಹಮಾನ್‌ ಅಬ್ದುಲ್ಲಾ ಅವರನ್ನು ಭೇಟಿ ಮಾಡಿದ ಮೋದಿ ಅವರು, ಎರಡೂ ದೇಶಗಳ ಮಧ್ಯೆ ‘ಸಂಸತ್ತಿನ ಸ್ನೇಹ ಗುಂಪು’ವೊಂದನ್ನು ರೂಪಿಸಿದ್ದನ್ನು ಸ್ವಾಗತಿಸಿದರು. ಪ್ರಧಾನಿ ಮೋದಿ ಅವರಿಗಾಗಿ ಶುಕ್ರವಾರ ರಾತ್ರಿ ಭೋಜನಕೂಟವನ್ನು ಆಯೋಜಿಸಲಾಗಿತ್ತು.