ಷಿಕಾಗೊ ಒ’ಹೇರ್‌ ವಿಮಾನ ನಿಲ್ದಾಣದಲ್ಲಿ ಭಾರತೀಯ ಕಾರ್ಮಿಕ ಸಾವು

ನ್ಯೂಯಾರ್ಕ್‌: ಷಿಕಾಗೊ ಒ’ಹೇರ್‌ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಕಾರ್ಯನಿರ್ವಹಿಸುತ್ತಿದ್ದ 36 ವರ್ಷದ ಭಾರತೀಯ ವ್ಯಕ್ತಿಯೊಬ್ಬರು ವಿಮಾನವನ್ನು ಎಳೆದೊಯ್ಯುವ ವಾಹನದಡಿಗೆ ಬಿದ್ದು ಮೃತಪಟ್ಟಿದ್ದಾರೆ.

ಜಿಜೊ ಜಾರ್ಜ್‌ ಮೃತಪಟ್ಟವರು. ಕೇರಳದ ಪಟ್ಟಣಪುರಂ ಮೂಲದ ಜಾರ್ಜ್‌ ಎನ್‌ವಾಯ್‌ ಏರ್‌ನಲ್ಲಿ ನಿರ್ವಹಣಾ ಮೆಕ್ಯಾನಿಕ್‌ ಆಗಿ ಕಾರ್ಯನಿರ್ವಹಿಸುತ್ತಿದ್ದರು. ವಿಮಾನ ನಿಲ್ದಾಣದ ಸಮೀಪವಿರುವ ಹ್ಯಾಂಗರ್‌ನಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ವೇಳೆ ಈ ದುರ್ಘಟನೆ ನಡೆದಿದೆ. ಜಾರ್ಜ್‌ ಪತ್ನಿ ಎಂಟು ತಿಂಗಳ ಗರ್ಭಿಣಿಯಾಗಿದ್ದು, ಮಗು ಹಾಗೂ ತಂದೆ, ತಾಯಿಯನ್ನು ಅಗಲಿದ್ದಾರೆ. ಇಡೀ ಕುಟುಂಬವು ಷಿಕಾಗೊದಲ್ಲೇ ವಾಸಿಸುತ್ತಿದೆ.