ಗಾಜಾದ ಮೇಲೆ ಇಸ್ರೇಲ್ ಪಡೆಗಳ ವೈಮಾನಿಕ ದಾಳಿ: 165 ಪ್ಯಾಲೆಸ್ಟೀನಿಯರ ಹತ್ಯೆ
ಮಧ್ಯ ಗಾಜಾದಲ್ಲಿ ಇಸ್ರೇಲ್ ಪಡೆಗಳು ಶನಿವಾರ ನಡೆಸಿದ ವೈಮಾನಿಕ ದಾಳಿಗೆ ಕಟ್ಟಡಗಳು ಕುಸಿದಿವೆ
ಗಾಜಾ ಪಟ್ಟಿ: ಕೇಂದ್ರ ಗಾಜಾದ ಮೇಲೆ 24 ಗಂಟೆಗಳ ಅವಧಿಯಲ್ಲಿ ಇಸ್ರೇಲ್ ಪಡೆಗಳು ನಡೆಸಿರುವ ವೈಮಾನಿಕ ದಾಳಿಯಲ್ಲಿ 165 ಮಂದಿ ಪ್ಯಾಲೆಸ್ಟೀನಿಯರು ವೃತಪಟ್ಟಿದ್ದು, 250 ಮಂದಿ ಗಾಯಗೊಂಡಿದ್ದಾರೆ ಎಂದು ಗಾಜಾದ ಆರೋಗ್ಯ ಸಚಿವಾಲಯ ಶನಿವಾರ ತಿಳಿಸಿದೆ.
ಕೇಂದ್ರ ಗಾಜಾದ ನುಸಿರಾತ್ ಮತ್ತು ಬುರೇಜ್ ನಗರಗಳ ನಿರಾಶ್ರಿತರ ಶಿಬಿರಗಳ ಮೇಲೆ ಇಸ್ರೇಲ್ ಪಡೆಗಳು ವಾಯು ದಾಳಿ ತೀವ್ರಗೊಳಿಸಿದ್ದು, ನಾಗರಿಕರ ಸಾವು–ನೋವಿನ ಬಗ್ಗೆ ಜಾಗತಿಕ ಮಟ್ಟದಲ್ಲಿ ಕಳವಳ ವ್ಯಕ್ತವಾಗಿದೆ.
ಈ ನಡುವೆಯೇ ಅಮೆರಿಕದ ಜೋ ಬೈಡನ್‌ ಆಡಳಿತವು ಇಸ್ರೇಲ್‌ಗೆ ಶಸ್ತ್ರಾಸ್ತ್ರಗಳನ್ನು ಮಾರಾಟ ಮಾಡಲು ಅನುಮೋದನೆ ನೀಡಿದೆ.
ಪ್ಯಾಲೆಸ್ಟೀನ್‌ ಸಮಾಜದಲ್ಲಿ ಆಳವಾಗಿ ಬೇರುಬಿಟ್ಟಿರುವ ಹಮಾಸ್‌ ಬಂಡುಕೋರರನ್ನು ಪೂರ್ಣವಾಗಿ ಸದೆಬಡಿಯುವವರೆಗೂ ವೈಮಾನಿಕ ಮತ್ತು ಭೂದಾಳಿಯನ್ನು ದಾಳಿಯನ್ನು ಮುಂದುವರಿಸುವುದಾಗಿ ಇಸ್ರೇಲ್ ಹೇಳಿದೆ.
ಇಸ್ರೇಲ್‌ಗೆ ರಾಜತಾಂತ್ರಿಕವಾಗಿ ರಕ್ಷಣೆ ನೀಡುತ್ತಿರುವ ಅಮೆರಿಕ, ಶಸ್ತ್ರಾಸ್ತ್ರಗಳ ಮಾರಾಟವನ್ನು ಮುಂದುವರಿಸಿದೆ ಎಂದು ಮೂಲಗಳು ಹೇಳಿವೆ. ಈಗ ಯುದ್ಧ ನಿಲ್ಲಿಸಿದರೆ ಅದು ಹಮಾಸ್‌ ಬಂಡುಕೋರರಿಗೆ ಜಯ ಸಿಕ್ಕಂತೆ ಎಂದು ಇಸ್ರೇಲ್ ಹೇಳಿದೆ.
ನುಸಿರಾತ್‌ನಲ್ಲಿ ಪತ್ರಕರ್ತ ಜಾಬರ್ ಅಬು ಹದ್ರಾಜ್ ಎಂಬವರ ಮನೆಯನ್ನು ಗುರಿಯಾಗಿಸಿ ಇಸ್ರೇಲ್ ಪಡೆಗಳು ಶುಕ್ರವಾರ ವಾಯು ದಾಳಿ ನಡೆಸಿದ್ದು, ಈ ದಾಳಿಯಲ್ಲಿ ಜಾಬರ್ ಅಬು ಮತ್ತು ಅವರ ಕುಟುಂಬದ ಆರು ಮಂದಿ ಸದಸ್ಯರು ಮೃತಪಟ್ಟಿದ್ದಾರೆ ಎಂದು ಮೂಲಗಳು ಹೇಳಿವೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.