ಆಸ್ಟ್ರೇಲಿಯಾದಲ್ಲಿ ಭಾರೀ ಪ್ರವಾಹ: 8 ಸಾವು

ಬ್ರಿಸ್ಬೇನ್‌ (ಎಪಿ): ಆಸ್ಟ್ರೇಲಿಯಾದಲ್ಲಿ ಸುರಿಯುತ್ತಿರುವ ಭಾರೀ ಮಳೆಗೆ ದೇಶದ 3ನೇ ಅತಿ ದೊಡ್ಡ ನಗರ, ಕ್ವಿನ್ಸ್‌ಲ್ಯಾಂಡ್‌ನ ರಾಜಧಾನಿ ಬ್ರಿಸ್ಬೇನ‌್ ಜಲಾವೃತಗೊಂಡಿದ್ದು, ಪ್ರವಾಹದಿಂದ ಎಂಟು ಮಂದಿ ಮೃತಪಟ್ಟಿದ್ದಾರೆ.ಕಾಣೆಯಾದವರಿಗೆ ಹುಡುಕಾಟ ನಡೆಸಲಾಗುತ್ತಿದೆ.

ಬ್ರಿಸ್ಬೇನ್‌ ನದಿ ಪ್ರವಾಹಕ್ಕೆ 2,145 ಮನೆಗಳು, 2,356 ವ್ಯಾಪಾರ ಉದ್ಯಮದ ಕಟ್ಟಡಗಳು ನೀರಿನಲ್ಲಿ ಮುಳುಗಿವೆ. 10,827 ಆಸ್ತಿಗಳೂ ಭಾಗಶಃ ಪ್ರವಾಹದಿಂದ ಹಾನಿಗೊಂಡಿವೆ. ಸಂಚಾರ ವ್ಯವಸ್ಥೆಯೂ ಅಸ್ತವ್ಯಸ್ತಗೊಂಡಿದೆ. ನದಿ ಪಾತ್ರದಲ್ಲಿರುವ ವ್ಯಾಪಾರ ಮಳಿಗೆಗಳನ್ನು ಸ್ಥಳಾಂತರಿಸಲಾಗಿದೆ. ಪ್ರವಾಹದ ತುರ್ತು ಎಚ್ಚರಿಕೆ ನೀಡಲಾಗಿದೆ.

ಪ್ರವಾಹದಿಂದಾಗಿ ರಸ್ತೆ, ರೈಲು ಮತ್ತು ದೋಣಿಗಳ ಸಂಚಾರವನ್ನು ಸ್ಥಗಿತಗೊಳಿಸಲಾಗಿದೆ ಎಂದು ಸಾರಿಗೆ ಸಚಿವ ಮಾರ್ಕ್‌ ಬೈಲಿ ತಿಳಿಸಿದ್ದಾರೆ.

ಆಸ್ಟ್ರೇಲಿಯಾದ ಮತ್ತೊಂದು ನಗರ ಲಿಸ್‌ಮೋರ್‌ನಲ್ಲಿ ಸಹ ಪ್ರವಾಹ ತಲೆದೋರಿದ್ದು, 15,000 ನಾಗರಿಕರನ್ನು ಸ್ಥಳಾಂತರಿಸಲಾಗಿದೆ.