ಉಕ್ರೇನ್ ಬಂದರಿಗೆ ರಷ್ಯಾ ದಾಳಿ: 8 ಮಂದಿ ಸಾವು, 27 ಜನರಿಗೆ ಗಾಯ

ಕೀವ್: ದಕ್ಷಿಣ ಉಕ್ರೇನ್‌ನ ಒಡೆಸಾದಲ್ಲಿರುವ ಬಂದರಿನ ಮೂಲಸೌಲಭ್ಯದ ಮೇಲೆ ಶುಕ್ರವಾರ ತಡರಾತ್ರಿ ರಷ್ಯಾ ನಡೆಸಿದ ಕ್ಷಿಪಣಿ ದಾಳಿಯಲ್ಲಿ 8 ಜನರು ಮೃತಪಟ್ಟಿದ್ದು, 27 ಜನರು ಗಾಯಗೊಂಡಿದ್ದಾರೆ ಎಂದು ಉಕ್ರೇನ್‌ನ ತುರ್ತು ಸೇವೆ ಶನಿವಾರ ಬೆಳಿಗ್ಗೆ ಹೇಳಿದೆ.

ಗಾಯಗೊಂಡವರಲ್ಲಿ ಕೆಲವರು ದಾಳಿಯ ಕೇಂದ್ರಬಿಂದುವಾಗಿದ್ದ ಬಸ್‌ನಲ್ಲಿದ್ದರು ಎಂದು ಅದು ಟೆಲಿಗ್ರಾಮ್‌ನಲ್ಲಿ ತಿಳಿಸಿದೆ. ದಾಳಿಯಿಂದಾಗಿ ಪಾರ್ಕಿಂಗ್ ಸ್ಥಳದಲ್ಲಿ ಟ್ರಕ್‌ಗಳಿಗೆ ಬೆಂಕಿ ಹೊತ್ತಿಕೊಂಡಿದ್ದು, ಕಾರುಗಳು ಸಹ ಹಾನಿಗೊಳಗಾಗಿವೆ.

ಬಂದರಿನ ಮೇಲೆ ಬ್ಯಾಲಿಸ್ಟಿಕ್ ಕ್ಷಿಪಣಿಗಳಿಂದ ದಾಳಿ ಮಾಡಲಾಗಿದೆ ಎಂದು ಒಡೆಸಾ ಪ್ರದೇಶದ ಮುಖ್ಯಸ್ಥ ಒಲೆಹ್ ಕೈಪರ್ ಹೇಳಿದ್ದಾರೆ.

ಮತ್ತೊಂದೆಡೆ, ಉಕ್ರೇನ್‌ನ ಪಡೆಗಳು ರಷ್ಯಾದ ಯುದ್ಧನೌಕೆ ಮತ್ತು ಇತರ ಸೌಲಭ್ಯಗಳನ್ನು ಡ್ರೋನ್ ಮೂಲಕ ಹೊಡೆದುರುಳಿಸಿವೆ ಎಂದು ಉಕ್ರೇನ್‌ ಶನಿವಾರ ತಿಳಿಸಿದೆ.