ಇಸ್ರೇಲ್‌: ಅಧಿಕೃತ ನಿವಾಸ ತೆರವುಗೊಳಿಸಿದ ಮಾಜಿ ಪ್ರಧಾನಿ ನೆತನ್ಯಾಹು

ಜೆರುಸಲೇಂ: ಇಸ್ರೇಲ್‌ ಮಾಜಿ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರು ತಮ್ಮ ಅಧಿಕೃತ ನಿವಾಸವನ್ನು ಭಾನುವಾರ ತೆರವುಗೊಳಿಸಿದರು.

ಇಸ್ರೇಲ್‌ನ ನೂತನ ಪ್ರಧಾನಿಯಾಗಿ ನಫ್ತಾಲಿ ಬೆನೆಟ್‌ ಅವರು ಅಧಿಕಾರ ಸ್ವೀಕರಿಸಿದ ಒಂದು ತಿಂಗಳ ಬಳಿಕ ಬೆಂಜಮಿನ್‌ ಅವರು ಜೆರುಸಲೇಂನಲ್ಲಿರುವ ತಮ್ಮ ಅಧಿಕೃತ ನಿವಾಸವನ್ನು ತೆರವುಗೊಳಿಸಿದ್ದಾರೆ.

‘ಶನಿವಾರ ತಡರಾತ್ರಿ ನೆತನ್ಯಾಹು ಅವರ ಕುಟುಂಬವು ಬಾಲ್ಫೋರ್ ಸ್ಟ್ರೀಟ್‌ನಲ್ಲಿರುವ ನಿವಾಸದಿಂದ ಹೊರ ನಡೆದಿದ್ದಾರೆ’ ಎಂದು ನೆತನ್ಯಾಹು ವಕ್ತಾರರು ವರದಿಗಾರರಿಗೆ ತಿಳಿಸಿದರು. ಅಧಿಕಾರ ಕಳೆದುಕೊಂಡ ಬಳಿಕ ಇಷ್ಟು ಸುದೀರ್ಘ ಅವಧಿಗೆ ಅಧಿಕೃತ ನಿವಾಸದಲ್ಲೇ ಉಳಿದ ಮಾಜಿ ಪ್ರಧಾನಿ ಎಂಬ ಕುಖ್ಯಾತಿಗೆ ನೆತನ್ಯಾಹು ಪಾತ್ರರಾಗಿದ್ದಾರೆ.