ಅಮೆರಿಕ ಬಾಹ್ಯಾಕಾಶ ಸಂಸ್ಥೆ ನಾಸಾದ 'ಚಂದ್ರನತ್ತ ಮಾನವ' ಯೋಜನೆ 2026ಕ್ಕೆ: ವರದಿ

ವಾಷಿಂಗ್ಟನ್‌: ಅಮೆರಿಕ ಬಾಹ್ಯಾಕಾಶ ಸಂಸ್ಥೆ ನಾಸಾದ ಮಹತ್ವಾಕಾಂಕ್ಷೆಯ ಚಂದ್ರನತ್ತ ಮಾನವ ಯೋಜನೆ 2025ರ ಬದಲಿಗೆ 2026ರಲ್ಲಷ್ಟೇ ಕಾರ್ಯರೂಪಕ್ಕೆ ಬರಲಿದೆ ಎಂದು ಸರ್ಕಾರಿ ಲೆಕ್ಕ‍ಪರಿಶೋಧನೆಯ ಪ್ರಕಟಣೆಯೊಂದು ಸೋಮವಾರ ಹೇಳಿದೆ.

‘ತಾಂತ್ರಿಕ ಸಮಸ್ಯೆಗಳು, ಕೋವಿಡ್‌ ಪಿಡುಗು ಮತ್ತು ಹವಾಮಾನದ ತೊಂದರೆಗಳಿಂದಚಂದ್ರನತ್ತ ಅಮೆರಿಕನ್ನರನ್ನು ಕಳುಹಿಸುವ ಆರ್ಟಿಮಿಸ್ ಯೋಜನೆಯುವಿಳಂಬವಾಗಿದೆ’ ಎಂದು ನಾಸಾದ ಲೆಕ್ಕ ಪರಿಶೋಧನಾ ವಿಭಾಗದ ಇನ್‌ಸ್ಪೆಕ್ಟರ್‌ ಜನರಲ್‌ ಕಚೇರಿ ವರದಿಯೊಂದರಲ್ಲಿ ತಿಳಿಸಿದೆ.

‘ಅಗತ್ಯ ನಿಧಿಯ ಕೊರತೆ, ಸೂಕ್ತ ಸಮಯದ ನಿರ್ವಹಣೆಯ ಸಮಸ್ಯೆ ಮತ್ತು ಪ್ರಮುಖ ತಾಂತ್ರಿಕ ತೊಂದರೆಗಳಿಂದ ಚಂದ್ರನ ದಕ್ಷಿಣ ಧ್ರುವದಲ್ಲಿ ಇಳಿಸುವ ನಾಸಾದ ಯೋಜನೆ 2024ರ ನಂತರ ಕೈಗೂಡಲಿದೆ’ ಎಂದು ವರದಿ ವಿವರಿಸಿದೆ.

‘ಯೋಜನೆಗೆ ಅಗತ್ಯವಾದ ಪರಿಕರಗಳು 2025ಕ್ಕಿಂತ ಮೊದಲು ಸಿದ್ಧವಾಗುವುದಿಲ್ಲ. ಎರಡನೆಯದಾಗಿ ಮಾನವನನ್ನು ಇಳಿಸುವ ವ್ಯವಸ್ಥೆಯ ಅಭಿವೃದ್ಧಿಯೂ ತಡವಾಗಲಿದೆ’ ಎಂದೂ ಅದು ಮಾಹಿತಿ ನೀಡಿದೆ. ಈ ಮೊದಲು 2025ರಲ್ಲಿ ಯೋಜನೆ ಕಾರ್ಯಗತಗೊಳ್ಳಲಿದೆ ಎಂದು ತಿಳಿಸಲಾಗಿತ್ತು.