ಉತ್ತರ ಜಪಾನ್‌ನಲ್ಲಿ ಪ್ರಬಲ ಭೂಕಂಪ; ಸುನಾಮಿ ಅಪಾಯ ಇಲ್ಲ

ಟೋಕಿಯೊ:‘ ಉತ್ತರ ಜಪಾನ್‌ನಲ್ಲಿ ಶನಿವಾರ ಪ್ರಬಲ ಭೂಕಂಪ ಸಂಭವಿಸಿದೆ.ಈ ಭೂಕಂಪದಲ್ಲಿ ಯಾವುದೇ ಸಾವು–ನೋವು ಸಂಭವಿಸಿಲ್ಲ. ಅಲ್ಲದೆ ಇದರಿಂದಾಗಿ ಸುನಾಮಿಯ ಅಪಾಯವೂ ಕಂಡುಬಂದಿಲ್ಲ’ ಎಂದು ಮೂಲಗಳು ಹೇಳಿವೆ.

‘ರಿಕ್ಟರ್‌ ಮಾಪಕದಲ್ಲಿ ಕಂಪನದ ತೀವ್ರತೆ 6.6ರಷ್ಟು ದಾಖಲಾಗಿದೆ. ಕಂಪನದ ಕೇಂದ್ರ ಬಿಂದು 60 ಕಿ.ಮೀ ಆಳದಲ್ಲಿ ಪತ್ತೆಯಾಗಿದೆ’ ಎಂದು ಜಪಾನ್‌ ಹವಾಮಾನ ಸಂಸ್ಥೆ ಹೇಳಿದೆ. ಆದರೆ ಅಮೆರಿಕದ ಭೂ ಸರ್ವೇಕ್ಷಣಾ ಇಲಾಖೆಯು ಕಂಪನದ ತೀವ್ರತೆ 6.8ರಷ್ಟಿತ್ತು ಎಂದು ತಿಳಿಸಿದೆ.

‘ಈ ಭೂಕಂಪನದಿಂದ ಸಾರಿಗೆ ವ್ಯವಸ್ಥೆಗೆ ಅಡಚಣೆ ಉಂಟಾಗಿಲ್ಲ. ಆದರೆ ಸುರಕ್ಷತಾ ತಪಾಸಣೆಗಾಗಿ ಶಿಂಕಾನ್ಸೆನ್ ಬುಲೆಟ್ ರೈಲುಗಳನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿದೆ. ಕೆಲವೊಂದು ಸ್ಥಳೀಯ ರೈಲುಗಳು ತಡವಾಗಿ ಸಂಚರಿಸಿದವು’ ಎಂದು ಪೂರ್ವ ಜಪಾನ್‌ ರೈಲ್ವೆ ಮಾಹಿತಿ ನೀಡಿದೆ.