ವಿವಿಧೆಡೆ ಕ್ಷಿಪಣಿ ದಾಳಿ: ಗಣಿಯಲ್ಲಿ ಸಿಕ್ಕಿಬಿದ್ದ 600 ಕಾರ್ಮಿಕರು
ಕೀವ್ (ಎ.ಪಿ): ಉಕ್ರೇನ್‌ನ ರಾಜಧಾನಿ ಕೀವ್ ಸೇರಿದಂತೆ ವಿವಿಧ ನಗರಗಳ ಮೇಲೆ ರಷ್ಯಾ ಕ್ಷಿಪಣಿ ದಾಳಿಯನ್ನು ಮುಂದುವರಿಸಿದೆ. ಶುಕ್ರವಾರ ಕೀವ್ ನಗರವನ್ನೇ ಗುರಿಯಾಗಿಸಿ 12ಕ್ಕೂ ಹೆಚ್ಚು ಕ್ಷಿಪಣಿ ದಾಳಿ ನಡೆದಿದೆ.
ಕೀವ್, ಹಾರ್ಕಿವ್‌, ಝಪೋರ್ಹಿಝಿಯಾ ನಗರಗಳಲ್ಲಿ ವಿದ್ಯುತ್‌ ವ್ಯತ್ಯಯ ಮುಂದುವರಿದಿದೆ. ನೀರು ಮತ್ತು ವಿದ್ಯುತ್‌ ಸಂಪರ್ಕ ಸೌಲಭ್ಯಗಳನ್ನೇ ಗುರಿಯಾಗಿಸಿ ರಷ್ಯಾ ದಾಳಿ ನಡೆಸುತ್ತಿದೆ ಎಂದು ಉಕ್ರೇನ್ ಹೇಳಿದೆ.ಚಳಿಗಾಲ ಆವರಿಸುತ್ತಿದ್ದಂತೆ ಇದರಿಂದ ಜನರ ಸಂಕಷ್ಟವೂ ಹೆಚ್ಚುತ್ತಿದೆ.
ಕ್ಷಿಪಣಿ ದಾಳಿ ಹಿನ್ನೆಲೆಯಲ್ಲಿಕ್ರಿವಿ ರಿಹ್ ನಗರದ ಗಣಿಯೊಂದರಲ್ಲಿ ಸುಮಾರು 600 ಕಾರ್ಮಿಕರು ರಕ್ಷಣೆ ಪಡೆದಿದ್ದಾರೆ. ಈ ಪೈಕಿ 250 ಜನರನ್ನು ರಕ್ಷಿಸಿದ್ದು, ಉಳಿದವರ ರಕ್ಷಣಾ ಕಾರ್ಯಾಚರಣೆ ನಡೆದಿದೆ ಎಂದು ಅಧಿಕಾರಿಗಳು ವಿವರಿಸಿದ್ದಾರೆ.
ರಷ್ಯಾ ಅತಿಕ್ರಮಣ ನಡೆಸಿದ ಕಳೆದ 10 ತಿಂಗಳಲ್ಲಿ ಕೀವ್ ನಗರದ ಮೇಲೆ ಇತ್ತೀಚಿನ ದಿನಗಳಲ್ಲಿಯೇ ದೊಡ್ಡ ಪ್ರಮಾಣದ ದಾಳಿ ನಡೆದಿದೆ. 40 ಕ್ಷಿಪಣಿಗಳ ಪೈಕಿ 37 ಅನ್ನು ಉಕ್ರೇನ್ ವಾಯುರಕ್ಷಣೆ ವ್ಯವಸ್ಥೆಯು ಹೊಡೆದುರುಳಿಸಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಕ್ಷಿಪಣಿ ದಾಳಿಯಿಂದ ವಸತಿ ಸಂಕೀರ್ಣವು ಜಖಂಗೊಂಡಿದೆ. ಮೂವರು ಮೃತಪಟ್ಟಿದ್ದು, 13 ಜನರು ಗಾಯಗೊಂಡರು. ಅವಶೇಷಗಳಡಿ ತಾಯಿ, ಮಗು ಸಿಕ್ಕಿಬಿದ್ದಿದ್ದು, ರಕ್ಷಣಾ ಕಾರ್ಯ ನಡೆದಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.