ಸಮರಾಭ್ಯಾಸದ ಮೂಲಕ ತೈವಾನ್ ಶಕ್ತಿ ಪ್ರದರ್ಶನ: ಚೀನಾಗೆ ಎಚ್ಚರಿಕೆ ಸಂದೇಶ
ತೈಚುಂಗ್‌(ತೈವಾನ್): ಚೀನಾ ಮತ್ತು ತೈವಾನ್ ನಡುವಿನ ಪರಿಸ್ಥಿತಿ ದಿನೇ ದಿನೇ ಮತ್ತಷ್ಟು ಬಿಗಡಾಯಿಸುತ್ತಿದೆ. ಈ ನಡುವೆ ತೈವಾನ್ ಸಮರಾಭ್ಯಾಸದ ಮೂಲಕ ಗುರುವಾರ ತನ್ನ ಶಕ್ತಿ ಪ್ರದರ್ಶಿಸಿದೆ.
ಚೀನಾದತ್ತ ಮುಖ ಮಾಡಿರುವ ತೈಚುಂಗ್‌ನ ದ್ವೀಪವೊಂದರ ಕಡಲ ತೀರದ ಬಳಿ ತೈವಾನ್ ಸೇನೆಯು ಸಮರಾಭ್ಯಾಸ ನಡೆಸಿದ್ದು, ಈ ವೇಳೆ ಯುದ್ಧ ವಿಮಾನಗಳು ಸಮುದ್ರಕ್ಕೆ ಗುಂಡು ಮತ್ತು ಬಾಂಬ್‌ ಹಾರಿಸಿದವು. ಅಲ್ಲದೇ ಹೆಲಿಕಾಫ್ಟರ್‌ ಮೂಲಕ ನೀರಿಗೆ ಕ್ಷಿಪಣಿ ಉಡಾಯಿಸಲಾಯಿತು. ಈ ಮೂಲಕ ತೈವಾನ್ ಸೇನೆಯು ತನ್ನ ಸೇನಾ ಬಲವನ್ನು ಪ್ರದರ್ಶಿಸಿದೆ.
‘ನಾವು ನಮ್ಮ ದೇಶವನ್ನು ರಕ್ಷಿಸುವಲ್ಲಿ ಸಮರ್ಥರಾಗಿದ್ದೇವೆ ಎಂಬುದನ್ನು ಜಗತ್ತಿಗೆ ತಿಳಿಯಪಡಿಸುವುದು ಇದರ ಪ್ರಮುಖ ಗುರಿಯಾಗಿದೆ ಎಂದು ತೈವಾನ್‌ಅಧ್ಯಕ್ಷ ತ್ಸೈ ಇಂಗ್-ವೆನ್ ತಿಳಿಸಿದರು.
ಐದು ದಿನಗಳ ಈ ಸಮರಾಭ್ಯಾಸ ಶುಕ್ರವಾರ ಕೊನೆಗೊಳ್ಳಲಿದೆ. ತೈವಾನ್ ಅನ್ನು ಚೀನಾ ತನ್ನ ಭೂಪ್ರದೇಶದ ಭಾಗ ಎಂದು ಪ್ರತಿಪಾದಿಸುತ್ತಿದೆ. ಆದರೆ 160 ಕಿ.ಮೀ. ಭೂಪ್ರದೇಶವನ್ನು ಹೊಂದಿರುವ ತೈವಾನ್ ತನ್ನದೇ ಆದ ಸರ್ಕಾರವನ್ನು ಹೊಂದಿದ್ದು, 2.40 ಕೋಟಿ ಜನರು ಇಲ್ಲಿ ವಾಸಿಸುತ್ತಿದ್ದಾರೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.