ಇರಾನ್ ಮೇಲೆ ದಾಳಿ: ಟ್ರಂಪ್ ವಾಗ್ದಂಡನೆ ಯತ್ನಕ್ಕೆ ಅಮೆರಿಕ ಸಂಸತ್ತಿನಲ್ಲಿ ಸೋಲು

ವಾಷಿಂಗ್ಟನ್: ಅಧಿಕಾರವನ್ನು ದುರುಪಯೋಗ ಪಡಿಸಿಕೊಂಡಿದ್ದಾರೆ ಎನ್ನುವ ಆರೋಪದ ಮೇಲೆ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರನ್ನು ವಾಗ್ದಂಡನೆಗೆ ಗುರಿಪಡಿಸುವ ಪ್ರಯತ್ನಕ್ಕೆ ಅಮೆರಿಕ ಸಂಸತ್ತಿನಲ್ಲಿ ಸೋಲಾಗಿದೆ.

ಸಂತ್ತಿನ ಅನುಮೋದನೆ ಪಡೆಯದೆ ಇರಾನ್‌ನ ಪರಮಾಣು ಘಟಕಗಳ ಮೇಲೆ ದಾಳಿ ನಡೆಸಿ, ಅಧಿಕಾರ ದುರುಪಯೋಗ ಪಡಿಸಿಕೊಂಡಿದ್ದಾರೆ ಎಂದು ವಾಗ್ದಂಡನೆ ನೋಟಿಸ್ ನೀಡಲಾಗಿತ್ತು.

ಡೆಮಾಕ್ರಟ್ ಪಕ್ಷದ ಟೆಕ್ಸಾಸ್‌ ಸಂಸ ಎ.ಐ ಗ್ರೀನ್ ನೀಡಿದ್ದ ವಾಗ್ದಂಡನೆ ನೋಟಿಸ್ ಬಗ್ಗೆ ಸಂಸತ್ತಿನಲ್ಲಿ ಹೃಸ್ವ ಚರ್ಚೆ ನಡೆಯಿತು. ಅವರದೇ ಪಕ್ಷದ ಸಂಸದರಿಂದಲೇ ಇದಕ್ಕೆ ಬೆಂಬಲ ಸಿಗಲಿಲ್ಲ. 344–79 ಬಹುಮದಿಂದ ವಾಗ್ದಂಡನೆ ಪ್ರಯತ್ನಕ್ಕೆ ಸೋಲಾಯಿತು.

‘ನಾನು ಮಾಡುತ್ತಿರುವ ಕೆಲಸದ ಬಗ್ಗೆ ನನಗೆ ಸಂತೋಷವಿಲ್ಲ. ಅಮೆರಿಕ ಸಂಸತ್ತಿಗೆ ತಿಳಿಸದೆ 30 ಕೋಟಿ ಮಂದಿಯನ್ನು ಯುದ್ಧಕ್ಕೆ ಕರೆದೊಯ್ಯುವ ಅಧಿಕಾರ ಯಾರಿಗೂ ಇಲ್ಲ’ ಎಂದು ಅವರು ಮತದಾನಕ್ಕೂ ಮುನ್ನ ಹೇಳಿದ್ದಾರೆ.