ಟರ್ಕಿ ಭೂಕಂಪ: ₹8.17 ಲಕ್ಷ ಕೋಟಿಗೂ ಹೆಚ್ಚು ಹಾನಿ

ಜಿನೀವಾ (ರಾಯಿಟರ್ಸ್‌): ಟರ್ಕಿಯಲ್ಲಿ ಭೂಕಂಪದಿಂದ ಆಗಿರುವ ಹಾನಿ ಅಂದಾಜು ₹8.17 ಲಕ್ಷ ಕೋಟಿಗೂ (100 ಬಿಲಿಯನ್‌ ಡಾಲರ್‌) ಹೆಚ್ಚಿದೆ ಎಂದು ವಿಶ್ವಸಂಸ್ಥೆಯ ಅಭಿವೃದ್ಧಿ ಕಾರ್ಯಕ್ರಮಗಳ ಅಧಿಕಾರಿ ಹೇಳಿದ್ದಾರೆ.

ಮಾರ್ಚ್ 16ರಂದು ಬೆಲ್ಜಿಯಂನ ಬ್ರಸೆಲ್ಸ್‌ನಲ್ಲಿ ನಡೆಯಲಿರುವ ಪ್ರಮುಖ ದಾನಿಗಳ ಸಮಾವೇಶಕ್ಕೂ ಮೊದಲು ಮಂಗಳವಾರ ವರ್ಚುವಲ್‌ ಪತ್ರಿಕಾಗೋಷ್ಠಿಯಲ್ಲಿ ಅಭಿವೃದ್ಧಿ ಕಾರ್ಯಕ್ರಮಗಳ ಅಧಿಕಾರಿ ಲೂಯಿಸಾ ವಿಂಟನ್‌ ಈ ವಿಷಯ ತಿಳಿಸಿದರು.

ಟರ್ಕಿ ಮತ್ತು ಸಿರಿಯಾದಲ್ಲಿ ಭೂಕಂಪದಿಂದ ಲಕ್ಷಾಂತರ ಮನೆಗಳು ನಾಶವಾಗಿವೆ. ತುರ್ತು ಅಗತ್ಯಗಳು ಅಪಾರವಾಗಿವೆ. ಆದರೆ, ಸಂಪನ್ಮೂಲಗಳು ವಿರಳವಾಗಿವೆ ಎಂದು ಅವರು ಹೇಳಿದರು.

ಫೆಬ್ರುವರಿ 6ರಂದು ಸಂಭವಿಸಿದ ಭೂಕಂಪದಿಂದ ಟರ್ಕಿ ಮತ್ತು ಸಿರಿಯಾದಲ್ಲಿ 52 ಸಾವಿರಕ್ಕೂ ಹೆಚ್ಚು ಜನರು ಮೃತಪಟ್ಟಿದ್ದಾರೆ.