ಉಕ್ರೇನ್‌: ಗುಂಡಿಕ್ಕಿ ಸಂಸದನ ಹತ್ಯೆ

ಕೀವ್‌: ಉಕ್ರೇನ್‌ನ ಸಂಸದ ಹಾಗೂ ಮಾಜಿ ಸ್ಪೀಕರ್‌ ಆಂಡ್ರೆ ಪರೂಬಿ (54) ಅವರನ್ನು ಲವೀವ್ ನಗರದಲ್ಲಿ ಶನಿವಾರ ಗುಂಡಿಕ್ಕಿ ಹತ್ಯೆ ಮಾಡಲಾಗಿದೆ.

ದುಷ್ಕರ್ಮಿಗಳು ನಡೆಸಿದ ಗುಂಡಿನ ದಾಳಿಯಲ್ಲಿ ಗಾಯಗೊಂಡ ಅವರು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ಹತ್ಯೆಯ ಹಿಂದಿನ ಕಾರಣ ಸ್ಪಷ್ಟವಾಗಿಲ್ಲ. ಗುಂಡಿನ ದಾಳಿ ನಡೆಸಿದ ವ್ಯಕ್ತಿಗಾಗಿ ಶೋಧ ನಡೆದಿದೆ ಎಂದಿದ್ದಾರೆ.

2016ರಿಂದ 2019ರವರೆಗೆ ಉಕ್ರೇನ್‌ ಸಂಸತ್‌ನ ಸ್ಪೀಕರ್‌ ಆಗಿದ್ದ ಪರೂಬಿ, 2004 ಹಾಗೂ 2014ರಲ್ಲಿ ನಡೆದಿದ್ದ ಕ್ರಾಂತಿಯ ಪ್ರಮುಖ ಬೆಂಬಲಿಗರಾಗಿದ್ದರು. ಪರೂಬಿ ಹತ್ಯೆ ಘಟನೆ ಬಗ್ಗೆ ಸಮಗ್ರ ತನಿಖೆ ನಡೆಸುವುದಾಗಿ ಅಧ್ಯಕ್ಷ ವೊಲೊಡಿಮಿರ್‌ ಝೆಲೆನ್‌ಸ್ಕಿ ಹೇಳಿದ್ದಾರೆ.