ಯೆಮೆನ್‌: ಹೂಥಿ ಬಂಡುಕೋರರಿಂದ ವಿಶ್ವಸಂಸ್ಥೆಯ ಮತ್ತಿಬ್ಬರು ಸಿಬ್ಬಂದಿ ವಶ

ವಿಶ್ವಸಂಸ್ಥೆ: ಯೆಮೆನ್‌ನಲ್ಲಿ ಆಹಾರ ವಿತರಣೆ ಸೇರಿ ನೆರವು ಕಾರ್ಯದಲ್ಲಿ ನಿರತರಾಗಿದ್ದ ವಿಶ್ವಸಂಸ್ಥೆಯ ಸಿಬ್ಬಂದಿ ಪೈಕಿ ಮತ್ತೆ ಇಬ್ಬರನ್ನು ಹೂಥಿ ಬಂಡುಕೋರರು ತಮ್ಮ ವಶಕ್ಕೆ ಪಡೆದಿದ್ದಾರೆ. 

ಕಳೆದ 48 ಗಂಟೆಯಲ್ಲಿ ವಿಶ್ವಸಂಸ್ಥೆಯ ಮೂವರು ಸಿಬ್ಬಂದಿಯ ಮನೆಗಳ ಮೇಲೆ ದಾಳಿ ನಡೆಸಿದ್ದಲ್ಲದೇ, ವಿಶ್ವಸಂಸ್ಥೆ ಕಚೇರಿಗಳಿಗೂ ನುಗ್ಗಿ ಬಂಡುಕೋರರು ದಾಂಧಲೆ ನಡೆಸಿದ್ದಾರೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ವಿಶ್ವಸಂಸ್ಥೆಯ ಉಪ ವಕ್ತಾರ ಫರ್ಹಾನ್‌ ಹಕ್‌ ಈ ಬಗ್ಗೆ ಮಾಹಿತಿ ನೀಡಿದ್ದು, ‘ಹೂಥಿಗಳ ವಶದಲ್ಲಿರುವ ಪ್ರದೇಶಗಳಲ್ಲಿ ವಿಶ್ವಸಂಸ್ಥೆಯ ನೆರವು ಕಾರ್ಯಾಚರಣೆಗಳನ್ನು ನಡೆಸುವುದು 2021ರಿಂದೀಚೆಗೆ ಕಷ್ಟವಾಗಿದೆ’ ಎಂದಿದ್ದಾರೆ.  

‘ವಿಶ್ವಸಂಸ್ಥೆಯ ಸಿಬ್ಬಂದಿ ಗೂಢಚಾರರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ ಎಂದು ಆರೋಪಿಸಿ, ಅವರನ್ನು ಬಂಡುಕೋರರು ವಶಕ್ಕೆ ಪಡೆಯುತ್ತಿದ್ದಾರೆ’ ಎಂದೂ ಅಧಿಕಾರಿ ಆರೋಪಿಸಿದ್ದಾರೆ.