ಅಕ್ರಮ ವಲಸೆಗೆ ನೆರವು: ಭಾರತದ ಟ್ರಾವೆಲ್‌ ಏಜೆನ್ಸಿ ಅಧಿಕಾರಿಗಳ ವೀಸಾಗೆ ನಿರ್ಬಂಧ

ನ್ಯೂಯಾರ್ಕ್‌/ ವಾಷಿಂಗ್ಟನ್‌: ಅಕ್ರಮ ವಲಸೆಗೆ ನೆರವು ನೀಡುತ್ತಿರುವ ಕಾರಣ ಭಾರತದ ಟ್ರಾವೆಲ್‌ ಏಜೆನ್ಸಿಗಳ ಮಾಲೀಕರು, ಹಿರಿಯ ಅಧಿಕಾರಿಗಳು ಮತ್ತು ಪ್ರತಿನಿಧಿಗಳ ವೀಸಾ ಮೇಲೆ ನಿರ್ಬಂಧ ವಿಧಿಸಿರುವುದಾಗಿ ಅಮೆರಿಕ ಸೋಮವಾರ ತಿಳಿಸಿದೆ.

‘ನಮ್ಮ ವಲಸೆ ನೀತಿಯು ಅಕ್ರಮ ವಲಸೆಯ ಅಪಾಯದ ಬಗ್ಗೆ ವಿದೇಶಿಗರಿಗೆ ಮಾಹಿತಿ ನೀಡುವುದು ಮಾತ್ರವಲ್ಲದೆ, ಅಕ್ರಮ ವಲಸೆಗೆ ನೆರವು ನೀಡಿದವರೂ ಸೇರಿದಂತೆ ಕಾನೂನು ಉಲ್ಲಂಘಿಸಿದ ಎಲ್ಲರನ್ನೂ ಹೊಣೆಗಾರರನ್ನಾಗಿಸುತ್ತದೆ’ ಎಂದು ವಿದೇಶಾಂಗ ಸಚಿವಾಲಯವು ಹೇಳಿಕೆಯಲ್ಲಿ ತಿಳಿಸಿದೆ.

ಅಕ್ರಮ ವಲಸೆ ಮತ್ತು ಮಾನವ ಕಳ್ಳಸಾಗಾಣಿಕೆಯಲ್ಲಿ ನಿರತರಾದವರ ಮೇಲೆ ನಿಗಾ ಇಡಲು ಅಮೆರಿಕದ ರಾಯಭಾರ ಕಚೇರಿ ಮತ್ತು ಕಾನ್ಸುಲೇಟ್‌ಗಳು ಕಾರ್ಯನಿರತವಾಗಿವೆ ಎಂದು ತಿಳಿಸಿದೆ.

ಭಾರತದ ಯಾವ ಟ್ರಾವೆಲ್‌ ಏಜೆನ್ಸಿಗಳು ಮತ್ತು ಅವುಗಳ ಪ್ರತಿನಿಧಿಗಳ ವೀಸಾ ಮೇಲೆ ನಿರ್ಬಂಧ ವಿಧಿಸಲಾಗಿದೆ ಎಂಬ ಮಾಹಿತಿಯನ್ನು ದೆಹಲಿಯಲ್ಲಿರುವ ಅಮೆರಿಕ ರಾಯಭಾರ ಕಚೇರಿಯು ನೀಡಿಲ್ಲ.