ಆಫ್ಗನ್ ಗಡಿಯಲ್ಲಿನ ಭಯೋತ್ಪಾದನಾ ಚಟುವಟಿಕೆ ಕುರಿತು ಚರ್ಚೆ ಮುಂದುವರಿಕೆ: ಅಮೆರಿಕ

ವಾಷಿಂಗ್ಟನ್‌: ಆಪ್ಗಾನಿಸ್ತಾನದ ಗಡಿಯುದ್ಧಕ್ಕೂ ನಡೆಯುತ್ತಿರುವ ಭಯೋತ್ಪಾದಕ ಚಟುವಟಿಕೆಗಳಿಗೆ ಸಂಬಂಧಿಸಿದಂತೆ ಅಮೆರಿಕವು ಪಾಕಿಸ್ತಾನದೊಂದಿಗೆ ಮಾತುಕತೆ ಮುಂದುವರಿಸಿದೆ ಎಂದು ಶ್ವೇತಭವನದ ಮಾಧ್ಯಮ ಕಾರ್ಯದರ್ಶಿ ಝಾನ್ ಕಿರ್ಬಿ ತಿಳಿಸಿದ್ದಾರೆ.

ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ‘ನಾವು ಅಫ್ಘಾನಿಸ್ತಾನದ ಗಡಿಯಲ್ಲಿ ನಡೆಯುತ್ತಿರುವ ಭಯೋತ್ಪಾದಕ ವಿಷಯಗಳ ಬಗ್ಗೆ ಪಾಕಿಸ್ತಾನದೊಂದಿಗಿನ ಚರ್ಚೆಯನ್ನು ಮುಂದುವರಿಸಿದ್ದೇವೆ. ಈ ಮಾತುಕತೆಯಿಂದ ಆ ದೇಶದವರೂ ಆಂತರಿಕ ಭಯೋತ್ಪಾದಕ ದಾಳಿಯಿಂದ ಬಳಲುತ್ತಿದ್ದಾರೆ ಎಂಬುದನ್ನು ನೆನಪಿಸಲು ಸಾಧ್ಯವಾಗುತ್ತದೆ ಎಂದು ಭಾವಿಸುತ್ತೇನೆ‘ ಎಂದರು.

ಓದಿ:ಜೈಶಂಕರ್‌–ಬ್ಲಿಕೆನ್‌ ಮಾತುಕತೆ, ಆಫ್ಗನ್‌ ಶಾಂತಿಗೆ ಬದ್ಧತೆ

‘ಅಮೆರಿಕದ ಪಡೆಗಳು ಆಫ್ಗನ್ ತೊರೆದ ನಂತರ ಚೀನಾವು ಶಾಂತಿಪಾಲನಾ ಪಡೆಯನ್ನು ಆಪ್ಗಾನಿಸ್ತಾನಕ್ಕೆ ಕಳುಹಿಸಲು ಯೋಚಿಸುತ್ತಿದೆಯಲ್ಲಾ‘ ಎಂದು ಕೇಳಿದಾಗ, ‘ನಾವು ಬೇರೆ ರಾಷ್ಟ್ರಗಳ ಬಗ್ಗೆ ಮಾತನಾಡುವುದಿಲ್ಲ ಮತ್ತು ನಾವು ಆಪ್ಗಾನಿಸ್ತಾನದ ಎಲ್ಲ ನೆರೆಹೊರೆಯ ರಾಷ್ಟ್ರದವರಿಗೂ, ಈ ದೇಶದ ಸಮಗ್ರತೆ ಮತ್ತು ಸಾರ್ವಭೌಮತ್ವವನ್ನು ಗೌರವಿಸುವಂತೆ ಕರೆ ನೀಡುತ್ತೇವೆ‘ ಎಂದರು.