ಶ್ವೇತಭವನದ ಸಂವಹನ ನಿರ್ದೇಶಕಿ ಸ್ಥಾನಕ್ಕೆ ಫರ‍್ಹಾ ರಾಜೀನಾಮೆ

ವಾಷಿಂಗ್ಟನ್‌: ಡೊನಾಲ್ಡ್ ಟ್ಂಪ್ ಆಡಳಿತದಲ್ಲಿ ಮೂರು ವರ್ಷಗಳಿಂದ ಶ್ವೇತಭವನದ ಸಂವಹನ ವಿಭಾಗದ ನಿರ್ದೇಶಕಿಯಾಗಿ ಸೇವೆ ಸಲ್ಲಿಸಿದ್ದ ಅಲ್ಯಾಸ್ಸಾ ಫರ‍್ಹಾ ಅವರು ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದಾರೆ.

ನೂತನ ಅಧ್ಯಕ್ಷರಾಗಿ ಆಯ್ಕೆಯಾಗಿರುವ ಜೋ ಬೈಡನ್ ಅವರ ಆಡಳಿತ ಆರಂಭವಾಗಲು ಇನ್ನೂ 50 ದಿನಗಳಿರುವಂತೆಯೇ ಫರ‍್ಹಾ ರಾಜೀನಾಮೆ ನೀಡಿದ್ದಾರೆ. ಗುರುವಾರ ಫರ‍್ಹಾ ಅವರ ರಾಜೀನಾಮೆ ವಿಚಾರವನ್ನು ಶ್ರೇತಭವನ ಪ್ರಕಟಿಸಿದೆ.

‘ಟ್ರಂಪ್ ಆಡಳಿತದಲ್ಲಿ ಮೂರೂವರೆ ವರ್ಷಗಳ ಕಾಲ ಸೇವೆ ಸಲ್ಲಿಸಲು ಅವಕಾಶ ಸಿಕ್ಕಿದ್ದು ಜೀವಮಾನದ ಅತ್ಯಂತ ಗೌರವಯುತ ಸಮಯವಾಗಿದೆ‘ ಎಂದು ಫರ‍್ಹಾ ರಾಜೀನಾಮೆ ಸಲ್ಲಿಸಿದ ನಂತರ ಹೇಳಿಕೆಯಲ್ಲಿ ತಿಳಿಸಿದ್ದಾರೆ. ಶುಕ್ರವಾರ ಶ್ವೇತಭವನದಲ್ಲಿ ಫರ‍್ಹಾ ಅವರ ಸೇವೆಯ ಕೊನೆಯ ದಿನವಾಗಿದೆ.

ಶ್ವೇತಭವನದ ಸಂವಹನ ನಿರ್ದೇಶಕರಾಗುವ ಮೊದಲು, ಫರ‍್ಹಾ ಅವರು ರಕ್ಷಣಾ ಕಾರ್ಯದರ್ಶಿಯ ಪತ್ರಿಕಾ ಕಾರ್ಯದರ್ಶಿಯಾಗಿ ಸೇವೆ ಸಲ್ಲಿಸಿದ್ದರು.