75 ವರ್ಷದ ಹಿಂದೆ: ಕಮ್ಯುನಿಸ್ಟರಿಂದ ಪೋಹಾಂಗ್‌ ವ್ಯೂಹ ಛೇದನ

ಟೋಕಿಯೊ, ಆಗಸ್ಟ್‌ 30– ಪೂರ್ವತೀರದ ಪೋಹಾಂಗ್‌ ಉತ್ತರದಲ್ಲಿರುವ ದಕ್ಷಿಣ ಕೊರಿಯದ ವ್ಯೂಹದೊಳಕ್ಕೆ ಕಮ್ಯುನಿಸ್ಟರ ‘ಶತಾಯ–ಗತಾಯ’ ಹೋರಾಟದ ದಳವೊಂದು ಈ ರಾತ್ರಿ ಛೇದಿಸಿ ನುಗ್ಗಿದೆ. ಅಮೆರಿಕನ್ನರು ತೀರದಲ್ಲಿರುವ ತಮ್ಮ ಹಡಗುಗಳಿಂದ ತೋಪಿನ ಮಳೆಗರೆದರೂ ಈ ದಳ ಲೆಕ್ಕಿಸದೆ ನುಗ್ಗಿತು. 

 ಈ ಮುಂಚೂಣಿಯ ಹಿಂಬದಿಯಲ್ಲಿ ಕನಿಷ್ಠ ಒಂದಾದರೂ ಕಮ್ಯುನಿಸ್ಟ್‌ ಡಿವಿಜನ್‌ ಇದ್ದು, ಅದು ಪ್ಯೂಸಾನ್‌ ಕಡೆಗೆ ರಭಸದಿಂದ ನುಗ್ಗಬೇಕೆಂಬ ಮಹಾ ಪ್ರಯತ್ನದ ಹೊಂಚು ಹಾಕುತ್ತಿದೆ ಎಂಬುದಾಗಿ ವರದಿಯಾಗಿದೆ.