25 ವರ್ಷಗಳ ಹಿಂದೆ | ಮೈಸೂರು: ಮತ್ತೆ 9 ಜೀತದಾಳುಗಳಿಗೆ ಮುಕ್ತಿ

ಮೈಸೂರು: ಮತ್ತೆ 9 ಜೀತದಾಳುಗಳಿಗೆ ಮುಕ್ತಿ

ಬೆಂಗಳೂರು, ಜುಲೈ 12– ಶ್ರೀರಂಗಪಟ್ಟಣದ ಕಲ್ಲು ಗಣಿಯಲ್ಲಿ ಜೀತದಾಳುಗಳನ್ನು ಸರಪಳಿಯಲ್ಲಿ ಕಟ್ಟಿ ಹಾಕಿದ ಘಟನೆ ಹಸಿಯಾಗಿರುವಾಗಲೇ ಮೈಸೂರು ಸಮೀಪದ ನೂಲು ಗಿರಣಿಯೊಂದರಲ್ಲಿ ಉತ್ತರ ಪ್ರದೇಶದ ಒಂಬತ್ತು ಮಂದಿ ಹದಿಹರೆಯದವರನ್ನು ಜೀತದಾಳುಗಳಾಗಿ ಇಟ್ಟುಕೊಂಡಿದ್ದ ಘಟನೆ ಬೆಳಕಿಗೆ ಬಂದಿದೆ.

ಉತ್ತರ ಪ್ರದೇಶಕ್ಕೆ ಸೇರಿದ ಯುವಕರು ನೂಲಿನ ಗಿರಣಿ ಮಾಲೀಕರ ಹಿಡಿತದಿಂದ ತಪ್ಪಿಸಿಕೊಂಡು ತಮ್ಮ ಊರಿಗೆ ಹೋಗುವ ಸಲುವಾಗಿ ಮೈಸೂರಿನಿಂದ ಬೆಂಗಳೂರಿನ ಬಸ್‌ ಹತ್ತುತ್ತಿರುವಾಗ ದಕ್ಷಿಣ ಭಾರತ ಮಾನವ ಹಕ್ಕು ಶಿಕ್ಷಣ ಹಾಗೂ ಸರ್ವೇಕ್ಷಣಾ (ಸಿಚೆರೆಮ್‌) ಕಾರ್ಯಕರ್ತ ಸೋನಿ ಎಂಬುವವರು ಪತ್ತೆ ಮಾಡಿದ್ದಾರೆ.