75 ವರ್ಷಗಳ ಹಿಂದೆ: ಪವಾಡ ಪುರುಷ ಸ್ಟೇಷನ್ ಮಾಸ್ಟರ್

ತಿರುಚನಾಪಳ್ಳಿ, ಡಿ.10– ಕುಮಾರ ಮಂಗಳಂ ರೈಲ್ವೆ ಸ್ಟೇಷನ್ ಮಾಸ್ಟರ್ ಶ್ರೀ ಟಿ.ಕೃಷ್ಣಮೂರ್ತಿ ಪಿಳ್ಳೆ ಎಂಬುವರು ಕೊಡುತ್ತಿರುವ ‘ಸರ್ವರೋಗ ನಿವಾರಣೆ’ ವಿಭೂತಿ ಪ್ರಸಾದವನ್ನೂ, ದಾರವನ್ನು ಸ್ವೀಕರಿಸಲು ಸಾವಿರಾರು ಜನರು ಬರುತ್ತಿದ್ದಾರೆ.

ಭಾನುವಾರ, ಶುಕ್ರವಾರಗಳಂದು ಸ್ತ್ರೀಯರಿಗೆ ಮಾತ್ರ ಪ್ರಸಾದವನ್ನು ಕೊಡಲಾಗುವುದು. ಈ ಪವಾಡ ಪುರುಷನಿಂದ ಪ್ರಸಾದವನ್ನು ಪಡೆಯಲು ಎಲ್ಲ ಜಾತಿಯ ಸಾವಿರಾರು ಮಂದಿ ಈತನ ಮನೆಯ ಮುಂದೆ ಕ್ಯೂ ನಿಲ್ಲುತ್ತಾರೆ.

ಕೆಲವು ತಿಂಗಳುಗಳಿಂದ ಅಲ್ಲಿಗೆ ಬರುವ ಜನರ ಸಂಖ್ಯೆ ಹೆಚ್ಚಿದಂತೆ ಗೂರಲು, ತೊನ್ನು ಮತ್ತು ಇತರ ವ್ಯಾಧಿಗಳು ಪ್ರಸಾದದಿಂದ ಗುಣ ವಾಗಿರುವ ಕತೆಗಳು ಹೆಚ್ಚಾಗುತ್ತಿವೆ.

ಕೊರಿಯಾ ತ್ಯಜಿಸಿ ಜಪಾನಿಗೆ ಓಟ

ಸಿಯೋಲ್, ಡಿ.10– ದಿಗ್ಬ್ರಾಂತರಾದ ಸಾವಿರಾರು ಕೊರಿಯಾ ನಿರಾಶ್ರಿತರು ರಾತ್ರಿಯಲ್ಲಿ ಸಣ್ಣಪುಟ್ಟ ದೋಣಿಗಳಲ್ಲಿ ಜಪಾನಿಗೆ ತಪ್ಪಿಸಿಕೊಂಡು ಹೋಗಲು ತಲೆಗೆ 200 ಡಾಲರುಗಳಷ್ಟು ತೆರುತ್ತಿದ್ದಾರೆ.

ಈ ಕಳ್ಳತನದ ಸಾಗಾಟಕ್ಕೆ ಕ್ಷಣಕ್ಷಣಕ್ಕೂ ಬೆಲೆ ಏರುತ್ತಿದೆ. ಅಮೆರಿಕಾ ಅಥವಾ ಜಪಾನಿನ ಹಣವನ್ನೇ ಕೊಡ ಬೇಕೆಂಬುದು ಒಯ್ಯುವವರ ಹಠ.