ವಾಚಕರವಾಣಿ | ಜನಪ್ರಿಯ ಧಾರಾವಾಹಿಗಳಲ್ಲಿ ಪಾತ್ರಧಾರಿಗಳ ಉಡುಪು ಬಿಂಬಿಸುವುದೇನು?

ಧರಿಸುವ ಉಡುಪು ನಮ್ಮ ವ್ಯಕ್ತಿತ್ವವನ್ನು ನಿರ್ಧರಿಸುವುದಿಲ್ಲ ಎಂದು ಕೆಲವರು ಹೇಳುತ್ತಾರೆ. ಆದರೆ ಒಬ್ಬ ರೈತ ಮಹಿಳೆ ಜೀನ್ಸ್‌ ಪ್ಯಾಂಟ್‌ ಧರಿಸಿದ್ದಕ್ಕೆ ಕೆಲ ದಿನಗಳ ಹಿಂದೆ ಕೆಲವರಿಂದ ಟೀಕೆಗಳು ವ್ಯಕ್ತವಾದವು. ಆಹಾರ ಪದ್ಧತಿ, ಉಡುಪು ಅವರವರ ವೈಯಕ್ತಿಕ ವಿಚಾರವೇ ಆಗಿರುತ್ತದೆ.

ಆದರೆ ಟಿ.ವಿ. ವಾಹಿನಿಗಳಲ್ಲಿ ಪ್ರಸಾರವಾಗುತ್ತಿರುವ ಬಹುತೇಕ ಧಾರಾವಾಹಿಗಳಲ್ಲಿ ಖಳನಾಯಕಿ ಪಾತ್ರಧಾರಿಗಳು ಯಾವಾಗಲೂ ಮಿಡಿ, ತೋಳುರಹಿತ ಉಡುಪುಗಳನ್ನೇ ಧರಿಸಿರುತ್ತಾರೆ. ನಾಯಕಿ ಪಾತ್ರಧಾರಿಗಳು ಮಾತ್ರ ಲಂಗ– ದಾವಣಿ, ಸೀರೆ ಉಟ್ಟಿರುತ್ತಾರೆ. ಇದನ್ನು ಧಾರಾವಾಹಿಗಳ ನಿರ್ದೇಶಕರು ಯಾವ ರೀತಿಯಲ್ಲಿ ಅರ್ಥೈಸಿಕೊಂಡಿದ್ದಾರೆ?

-ಪ್ರತಿಭಾ ಟಿ.ಎಸ್‌., ಚಿತ್ರದುರ್ಗ