ವಾಚಕರ ವಾಣಿ| ನಿರೀಕ್ಷೆ ತರ್ಕಬದ್ಧವಾಗಿರಲಿ

ಅಮೆರಿಕದಲ್ಲಿ ಕೆಲಸ ಕಳೆದುಕೊಂಡಿರುವ 80,000 ಭಾರತೀಯರಲ್ಲಿ ಹೆಚ್ಚಿನವರು ನರೇಂದ್ರ ಮೋದಿ ಅವರ ಅಭಿಮಾನಿಗಳಾಗಿದ್ದು, ಅವರಿಗೆ ಭಾರತದಲ್ಲಿ ಕೆಲಸದ ಅವಕಾಶಗಳನ್ನು ಒದಗಿಸಬೇಕೆಂದು ಚಿತ್ರನಿರ್ಮಾಪಕಿ ಸಂಘಮಿತ್ರ ಅವರು ನಿರೀಕ್ಷಿಸಿದ್ದಾರೆ (ಟ್ವೀಟ್‌, ಪ್ರ.ವಾ., ಜ. 25). ಈ ತರ್ಕವು ಎಷ್ಟು ಸಮಂಜಸ? ವಿದ್ಯೆ ಕಲಿತ ದೇಶವನ್ನು, ಹೆತ್ತವರನ್ನು ಬಿಟ್ಟು, ಡಾಲರ್ ಮೋಹಕ್ಕೆ ಒಳಗಾಗಿ ಅಮೆರಿಕದಲ್ಲಿ ನೆಲೆಯೂರಿರುವ, ಆ ದೇಶದ ಉನ್ನತಿಗಾಗಿ ಶ್ರಮಿಸುತ್ತಿರುವವರು ಅವರು.

ಅವರು ಸ್ವದೇಶದಲ್ಲೇ ಉಳಿದು ಭಾರತವನ್ನು ಮುಂಚೂಣಿ ರಾಷ್ಟ್ರವನ್ನಾಗಿಸಲು ಪ್ರಯತ್ನಿಸಬಹುದಿತ್ತು. ಈಗ ಕೆಲಸ ಕಳೆದುಕೊಂಡ ಮೇಲೆ, ಮೋದಿ ಅವರ ಅಭಿಮಾನಿಗಳು ಅನ್ನುವ ಕಾರಣಕ್ಕೆ ಅವರಿಗೆಲ್ಲಾ ನಮ್ಮ ದೇಶದಲ್ಲಿ ಉದ್ಯೋಗ ಅವಕಾಶವನ್ನು ಕಲ್ಪಿಸುವುದು ಮುಖ್ಯವೋ ಅಥವಾ ನಮ್ಮ ದೇಶದಲ್ಲಿಯೇ ಇರುವ ಯುವಕರಿಗೆ ಉದ್ಯೋಗ ಸೃಷ್ಟಿಸುವುದು ಸಮಂಜಸವೋ? ಈ ಬಗ್ಗೆ ಸಂಘಮಿತ್ರ ಅವರು ಆತ್ಮಾವಲೋಕನ ಮಾಡಿಕೊಳ್ಳಬೇಕು.

– ಚೇತನ ಕೊಟ್ಟೂರ್, ಹುಬ್ಬಳ್ಳಿ