ವಾಚಕರ ವಾಣಿ | ತಿನಿಸಿನ ದರ ಕೈಸುಡುತ್ತಿದೆ

ಬಹುತೇಕ ಹೋಟೆಲ್, ಬೇಕರಿಗಳು ಸದ್ದು, ಸೂಚನೆ ಇಲ್ಲದೆ ತಿನಿಸು, ಪಾನೀಯಗಳ ದರ ಹೆಚ್ಚಿಸಿಕೊಂಡಿವೆ. ಮಾತ್ರವಲ್ಲ ಅವುಗಳ ಗಾತ್ರ ಕೂಡ ಕಡಿಮೆಯಾಗಿದೆ. ಅಗಿಯುವ, ನುಂಗುವ ಶ್ರಮ ಶೇಕಡ ಇಪ್ಪತ್ತರಷ್ಟಾದರೂ ಈಗ ಕಡಿಮೆ! ಕೋವಿಡ್ ನಿಯಂತ್ರಣ ನಿಮಿತ್ತದ ಲಾಕ್‍ಡೌನ್ ಬಿಸಿ ಯಾರನ್ನು ತಾನೇ ಬಿಟ್ಟಿದೆ? ಎಲ್ಲರೂ ಕಷ್ಟ, ನಷ್ಟ ಅನುಭವಿಸಿದವರೇ. ಹಾಗಾಗಿ ಗ್ರಾಹಕರ ಹಿತಾಸಕ್ತಿ ಕಡೆಗಣಿಸಬಾರದು. ಆಗ ಅಷ್ಟು ಕಳೆದುಕೊಂಡೆವು, ಈಗ ಸರಿದೂಗಿಸಿಕೊಳ್ಳುತ್ತೇವೆ ಎನ್ನುವ ಧೋರಣೆ ತಕ್ಕುದಲ್ಲ.

1979ರ ಸುಮಾರು. ರಾಜ್ಯದಲ್ಲಿ ಆಗ ಅಧಿಕಾರದಲ್ಲಿದ್ದ ಸರ್ಕಾರ ಎಲ್ಲಾ ಹೋಟೆಲ್, ಬೇಕರಿಗಳು ತಿನಿಸುಗಳ ದರ ಪಟ್ಟಿಯನ್ನು (ತೂಕ ನಮೂದು ಕಡ್ಡಾಯ!) ಪ್ರದರ್ಶಿಸಿರಬೇಕೆಂದು ಆದೇಶಿಸಿತ್ತು. ಹಿಂದೆ ಸಂದ ಸರ್ಕಾರಗಳ ಮಾದರಿಗಳು ಪಕ್ಷಾತೀತವಾಗಿ ಪ್ರಸ್ತುತ ಆಳ್ವಿಕೆಯನ್ನು ಸಕಾರಾತ್ಮಕವಾಗಿ ಪ್ರಭಾವಿಸುವಲ್ಲಿ ಪ್ರಜಾಸತ್ತೆಯ ಸೊಗಡಿದೆ.

-ಬಿಂಡಿಗನವಿಲೆ ಭಗವಾನ್,ಬೆಂಗಳೂರು