‘ಗ್ರೇಟ್‌ ವಾಲ್‌ ಆಫ್‌ ಇಂಡಿಯಾ’ ಇಲ್ಲಿದೆ
ಚೀನಾದ ಮಹಾಗೋಡೆ ವಿಶ್ವಪ್ರಸಿದ್ಧ. ಭಾರತದಲ್ಲೂ ಅಂತಹ ಮಹಾಗೋಡೆ ಇದೆ. ರಾಜಸ್ಥಾನದ ಕುಂಭಲಗಢ ಕೋಟೆ ‘ಗ್ರೇಟ್‌ ವಾಲ್‌ ಆಫ್‌ ಇಂಡಿಯಾ' ಎಂದೇ ಜನಪ್ರಿಯ.
ಈ ಕೋಟೆಯನ್ನು 500 ವರ್ಷಗಳ ಹಿಂದೆ ರಾಣಾ ಕುಂಭ ಎಂಬುವವರು ನಿರ್ಮಾಣ ಮಾಡಿದರು. ಶತ್ರುಗಳಿಂದ ರಕ್ಷಣೆ ಪಡೆಯಲು ಕೋಟೆಯ ನಾಲ್ಕು ದಿಕ್ಕುಗಳ ಸುತ್ತಲೂ ಗೋಡೆ ಕಟ್ಟಲಾಗಿದೆ. ರಾಜಸ್ತಾನದ ಉದಯಪುರದಿಂದ 64 ಕಿ.ಮೀ. ದೂರದಲ್ಲಿ ಈ ಕೋಟೆ ಇದೆ. ಅದರೊಳಗೆ 300ಕ್ಕೂ ಹೆಚ್ಚು ದೇವಸ್ಥಾನಗಳು ಇರುವುದು ವಿಶೇಷ.
ಇದರ ಗೋಡೆಗಳು 36 ಕಿ.ಮೀ.ಗಳಷ್ಟು ದೂರಕ್ಕೆ ಚಾಚಿಕೊಂಡಿದ್ದು, ಇದು ವಿಶ್ವದ ಎರಡನೇ ಅತಿ ದೊಡ್ಡ ಗೋಡೆಯಾಗಿದೆ. ಗೋಡೆಗಳು 15 ಅಡಿಯಷ್ಟು ದಪ್ಪವಿದ್ದರೆ, ಕೆಲವೊಂದು ಕಡೆ 15 ಮೀಟರ್‌ಗಳಷ್ಟು ದಪ್ಪ ಇವೆ. ಮಹಲ್‌ಗಳಿಂದ ಜನಪ್ರಿಯತೆ ಪಡೆದಿರುವ ಈ ಕೋಟೆಯಲ್ಲಿ ಬಾದಲ್‌ ಎಂಬ ಹೆಸರಿನ ಮಹಲ್‌ ಕೂಡ ಇದೆ. ಇದು ಇಮಾರತ್‌ ಬಾದಲೋಂಕಿ ಮಹಲ್‌ ಎಂಬ ಹೆಸರಿನಿಂದ ಪ್ರಸಿದ್ಧಿ ಪಡೆದಿದೆ.
ಈ ಗೋಡೆಗಳ ನಿರ್ಮಾಣಕ್ಕೆ ಎಲ್ಲಿಯೂ ಮಣ್ಣಿನ ಇಟ್ಟಿಗೆಗಳನ್ನು ಬಳಸಿಲ್ಲ. ಬದಲು ಭಾರವಾದ ಕಲ್ಲುಗಳಿಂದ ನಿರ್ಮಿಸಲಾಗಿದೆ. ಗೋಡೆಯ ಮೇಲ್ಭಾಗದಲ್ಲಿ ಕಲ್ಲಿನ ಆಲಂಕಾರಿಕ ಕೆತ್ತನೆಗಳನ್ನು ಕಾಣಬಹುದು. ಮಹಲ್‌ಗಳ ಮಂಟಪಗಳು ಅಪರೂಪದ ಶಿಲ್ಪಕಲೆಯನ್ನು ಹೊಂದಿವೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.