ಬಾತ್ರಾ ವಿರುದ್ಧ ಕಿರುಕುಳ ಆರೋಪ

ನವದೆಹಲಿ (ಪಿಟಿಐ): ಕಿರುಕುಳ ಹಾಗೂ ಅವಮಾನ ಮಾಡಿದ್ದಾರೆ ಎಂದು ಹಾಕಿ ಇಂಡಿಯಾದ ಪ್ರಧಾನ ಕಾರ್ಯದರ್ಶಿ ನರೇಂದ್ರ ಬಾತ್ರಾ ವಿರುದ್ಧ ಭಾರತ ಮಹಿಳಾ ಹಾಕಿ ತಂಡದ ಮಾಜಿ ನಾಯಕಿ ರೇಖಾ ಭಿಡೆ ಆರೋಪಿಸಿದ್ದಾರೆ.

ಇದಕ್ಕೆ ಸಂಬಂಧಿಸಿದಂತೆ ಭಿಡೆ ಅವರು ಕೇಂದ್ರ ಕ್ರೀಡಾ ಸಚಿವ ಜಿತೇಂದ್ರ ಸಿಂಗ್ ಅವರಿಗೆ ಗುರುವಾರ ಪತ್ರವೊಂದನ್ನು ಬರೆದಿದ್ದಾರೆ. `ಬಾತ್ರಾ ಅವರ ವಿಚಾರಗಳಿಗೆ ತಲೆದೂಗಲು ನಿರಾಕರಿಸಿದ್ದರಿಂದ ಕಿರುಕುಳ ಹಾಗೂ ಅವಮಾನ ಮಾಡಲಾಗಿತ್ತು. ಹಾಕಿ ಇಂಡಿಯಾದ ಕೆಲ ಅಧಿಕಾರಿಗಳಿಂದ ನನಗಾದ ಕಿರುಕುಳವನ್ನು ತಾಳಲಾರದೆ ಈ ಪತ್ರ ಬರೆಯುತ್ತಿದ್ದೇನೆ' ಎಂದೂ ಅವರು ಬರೆದಿದ್ದಾರೆ.

ಆದರೆ ಭಿಡೆ ಅವರಿಗೆ ಕಿರುಕುಳ ನೀಡಲಾಗಿತ್ತು ಎಂಬ ಆರೋಪವನ್ನು ಹಾಕಿ ಇಂಡಿಯಾದ ಪ್ರಧಾನ ಕಾರ್ಯದರ್ಶಿ ನರೇಂದ್ರ ಬಾತ್ರಾ ಅಲ್ಲಗಳೆದಿದ್ದಾರೆ.